नयाँ दिल्ली– भारतको दक्षिणी राज्य आन्ध्र प्रदेशमा गएको मंगलबार मात्र १३ घण्टाको बीचमा करिब ३७ हजार पटक बिजुली चम्किएको सरकारी अधिकारीहरुले जनाएका छन्।
आन्ध्र प्रदेशको विपद व्यवस्थापन प्राधिकारणले सो अवस्था सामान्यभन्दा धेरै माथिको भएको बताउँदै उक्त अवस्थालाई ‘चरम मौसमी ढाँचा’को संज्ञा दिएको छ।
प्राधिकारणका अनुसार मंगलबार १३ घण्टाको बीचमा ३६ हजार ७ सय ४९ पटक बिजुली चम्किएको थियो। सो क्रममा परेको चट्याङका कारण राज्यभर ९ वर्षकी एक बालिकासहित ९ जनाको मृत्यु भएको छ।
भारतमा वर्षाको मौसममा बिजुली चम्किनुलाई सामान्य रुपमा लिइन्छ। यो मौसम भारतमा सामान्यतया जुनदेखि सेप्टेम्बरसम्म रहन्छ। तर मनसुनको समय सुरु नहुँदै यती ठूलो संख्यामा बिजुली चम्किनुलाई सामान्यरुपमा लिन नसकिने आन्ध्र प्रदेशको विपद व्यवस्थापन केन्द्रमा किसान सन्कुले बताए।
‘अघिल्लो वर्षको मे महिनाभरीको तथ्यांक हेर्ने हो भने आन्ध्र प्रदेशमा करिब ३० हजार पटक मात्र बिजुली चम्किएको थियो। यसलाई आधार मान्दा मंगलबारको अवस्था सामान्यभन्दा धेरै माथिको हो।’, उनले भने।
केहि वैज्ञानिक तथा मौसमविद्हरुले भने ‘ग्लोबल वार्मिङ’ले गर्दा बिजुली चम्किने तथा चट्याङ पर्ने दर बढेर गएको दावी गर्दछन्।
उक्त दिन आन्ध्र प्रदेशको उत्तरी इलाकामा सबैभन्दा बढी बिजुली चम्किने तथा चट्याङ परेको बताइएको छ। अरेवियन सागरबाट आएको चिसो वायु र भारतको उत्तरी क्षेत्रबाट आएको तातो वायुबीचको टकरावका कारण सो क्षेत्रमा बढी मात्रामा बादल लागेको तथा वर्षा भएको थियो। जसका कारण नै सो क्षेत्रमा यती ठूलो संख्यामा बिजुली चम्किएको हुनसक्ने संकुले अनुमान लगाए।
उनका अनुसार मंगलबार करिब २ सय किलोमिटरभन्दा फराकिलो क्षेत्रमा बादल लागेको थियो। जसलाई उनले अनौठो घटनाको संज्ञा दिएका छन्। ‘सामान्यतया १५–१६ किलोमिटरको क्षेत्रसम्म यस्तो अवस्था देखिन्छ।’, उनले भने, ‘मेरो अनुभवमा यो असाध्यै दुर्लभ घटना हो।’
राष्ट्रिय अपराध अभिलेख ब्युरोका अनुसार भारतमा सन् २००५ देखि वर्षेनी कम्तिमा २ हजार मानिसको चट्याङ लागेर मृत्यु हुने गरेको तथ्यांक छ। सन् २०१६ जुनमा बिहार, झारखण्ड, उत्तर प्रदेश र मध्ये प्रदेशमा चट्याङका कारण ९३ जनाको मृत्यु हुनुका साथै अन्य २० जना घाइते भउका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_bCQoRa7C09-1776741913.jpg)
-1764146706.png)
