साहित्य डबली

विलय [कविता]

राजन पराजुली बुधबार, भदौ १७, २०७७ १३:०४

दश जना परिवारलाई
एक मुठी ढिँढो पकाउँदै गरेकी
आमालाई
काँधमा गह्रुँगा हतियार बोकेका
निधारमा राता टाला टल्काउँदै
छातीमा मृत्युको पत्र हल्लाउँदै
घरभित्र पसेका हुलले
'नआतिनुस् त्यो भाँडोभरी भोलि
चामल पाक्ने छ' भन्दै
त्यही ढिँढो खोसेर खानेहरू
हिजो आज विलय भैसके।

चुहुँदै गरेको खरको झुपडीभित्र
केराको पातले ओत लगाई बसिरहेका
परिवारलाई
ढोका ढकढक गराउँदै
'हामीलाई पनि ओत लाग्न दिनुहोस् न
केही समयपछि यो झुपड़ी महल
गराइदिने छौँ' भन्नेहरू
हिजो आज विलय भैसके

ठूलाठूला भारी बोकाउँदै
खाली खुट्टा रगतको भेल बगाई
हिँड्नेहरूलाई
'पर्ख केही समय
ती तिम्रा पाउहरूमा
सुनका जुता लगाई दिनेछौँ'
भन्नेहरू
हिजो आज विलय भैसके।

कालले पटकपटक
लखेटिरहँदा
आफ्नो ज्यान मृत्युको मुखमा राखी
मृत्युबाट जोगादिनेहरूलाई
लामो सास तान्दै
'तिम्रो यो गुनको बदला
विकासको काचुली फेरेर दिनेछौँ' भन्नेहरू
हिजो आज विलय भैसके।

जिरा मसिना चामलको भात चपाउँदा
जिब्रो बिझ्याउँछ रे
मही, दूध निल्दा घाँटी
खियाउँछ रे
मकैको ठेला चपाएर
कुवाको पानी निल्दा
जिन्दगी स्वर्ग सम्झनेहरू
हिजो आज विलय भैसके।

विलय भैसके
हिजो सपना देखाएर
कलम बोक्ने हातमा बन्दुक थमाउनेहरू।

विलय भैसके
झार र पातमा सुतेर
गरिबलाई सुन्दर महल
बनाइदिने छु भन्नेहरू।

विलय भैसके
रातो फेटा बाध्नेहरू
आज त केवल छन्
निधारमा रातो अबिर धस्नेहरू।

विलय भैसके
चर्को चर्को विकासका नारा लगाउनेहरू
घाटीमा विकासको नाम्लो भिर्नेहरू
हिजो आज छन्
सय किलोको माला लगाएर हिड्नेहरू।

विलय भैसके
आदर्श र नितीका कुरा
विचार र सिद्धांतका नारा
वर्ग र उत्पीडनका गाथा।

गरिबको चुलोमा आगो बाल्दिनेछु
पीडितलाई न्याय दिलाउनेछु
हात हातमा धनको वर्षा गराइदिनेछु
हतियार समाएर मात्र केही वर्ष
साथ दिनुहोस्
गरिबका झुपड़ीभित्र बसेर
यस्ता आदर्श छाड्नेहरू
विलय भैसके।

विलय भैसके
जसरी असिना जमिनभित्र
विलय हुन्छ
स्वयम ती व्यक्तिहरू
जो थोत्रा लुगा लगाएर
सुकिला र मुकिला विरुद्ध
चर्को नारा लगाउथे
आफू रगतले नुहाएर
बियरले नुहाउने विरूद्ध
कारबाहीमा जुट्थे।