काठमाडौं- च्याम्पियन्स लिग अन्तिम १६ अन्तर्गत दोस्रो लेगमा म्यानचेस्टर सिटी र रियल मड्रिडबीचको खेल सिटीको मैदानमा हुन कठिन देखिएको छ। बेलायतमा बाहिरबाट आउनेका लागि १४ दिनको क्वारेन्टाइन अनिवार्य भएसँगै इथिहाडमा खेल हुन समस्या हुने भएको हो।
गएको फेब्रुअरीमा रियल मड्रिड मैदान बर्नाबेउमा भएको पहिलो लेगमा सिटी २–१ ले विजयी भएको थियो। मार्च १७ मा हुनुपर्ने दोस्रो लेग कोरोना माहामारीका कारण सरेको हो। अहिले बेलायतमा बाहिरबाट आउनेका लागि १४ दिनको क्वारेन्टाइन अनिवार्य रहेकाले रियल मड्रिड खेलाडीहरुलाई समस्या हुने बताइएको छ।
यो नियम सामान्य पर्यटकका लागि मात्र लागु हुने हो या विशेष यात्रामा रहने खेलाडीहरुलाई पनि लागु हुने हो भन्ने दुविधाबारे पनि कुराकानी भइरहेका छन्। तर वेस्ट इन्डिजबाट इंग्ल्याण्डसँग टेस्ट खेल्न गएका खेलाडीहरु १४ दिन क्वारेन्टाइनमा बसेका थिए।
यहि समस्याका कारण युरोपियन फुटबलको प्रशासकीय निकाय युइएफएले खेल फरक मैदानमा गर्नेबारे पनि कुराकानी गरिरहेको छ।
च्याम्पियन्स लिगमा बाँकी रहेका अन्तिम १६ का खेलहरु अगस्ट ७ र ८ मा हुनेछन्। त्यसपछि क्वाटरफाइनलका खेलहरु अगस्ट १२ र १५ मा हुनेछन्। सेमिफाइनल अगस्ट १८ र १९ मा हुनेछ। फाइनल खेल अगस्ट २३ मा हुनेछ। क्वाटरफाइनल र सेमिफाइनल खेल पनि एक खेलको मात्र हुनेछन्। क्वाटरफाइनलदेखिका खेलहरु पोर्चुगलमा हुने तालिका रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
