मौद्रिक नीतिले उज्यालोको संकेत गरेको छ : पशुपति मुरारका

अन्तर्वार्ता - विचार

मौद्रिक नीतिले उज्यालोको संकेत गरेको छ : पशुपति मुरारका

नेपाल लाइभ शुक्रबार, साउन २, २०७७, १६:५९

काठमाडौं- मौद्रिक नीतिले उज्यालोको संकेत गरेको उद्योग वाणिज्य संघका पूर्वअध्यक्ष पशुपति मुरारकाले बताएका छन्। उद्योगी/व्यवसायीले सोचेजस्तो मौद्रिक नीति आएको बताउँदै उनले ऊर्जा क्षेत्रमा १० प्रतिशत लगानी गर्नुपर्ने भन्ने व्यवस्था सकारात्मक रहेको उल्लेख गरेका छन्।

पशुपति मुरारका
मौद्रिक नीति समग्रमा राम्रो छ। निजी क्षेत्रले अपेक्षा गरेजस्तो मौद्रिक नीति यसपटक आएको छ। हामीले सोचेजस्तो मौद्रिक नीति नेपाल राष्ट्र बैंकले ल्याएको छ। ऋणको पुनर्संरचना गर्ने सुविधा दिइएको छ। पुनर्कर्जासम्बन्धी व्यवस्थालाई पनि सहज बनाइदिएको छ।

बैंक तथा वित्तीय संस्थाहरूले एकमुष्टरूपमा लिएर आफैंले पुनर्कर्जा दिन सक्ने सुविधा पनि यसपटक दिइएको छ। महत्वपूर्ण विषय भनेको ब्याज भुक्तानीको समय सारिएको छ।

ऊर्जा क्षेत्रमा १० प्रतिशत लगानी गर्नुपर्ने भन्ने व्यवस्था सकारात्मक छ। जलविद्युतमा लगानी नगरेका बैंकहरूले अर्को बैंकको ऋण स्वीकार गर्नुपर्ने भयो। यसले जलविद्युतमा लगानी विस्तार गर्न सहयोग पुर्‍याउँछ भन्ने मेरो अपेक्षा छ।

अर्थतन्त्रलाई मौद्रिक नीतिले नै माथि लैजान्छ भन्ने होइन। तर जुन पीडा र समस्यामा व्यवसायीहरू थिए, त्यसलाई राहत दिएको छ। कर्जा निक्षेप अनुपातमा सहजीकरण गरिएकाले ब्याजदर घटाउन सहयोग गर्छ। यसले बैंकहरूको ऋण दिन सक्ने क्षमता पनि बढ्ने भएको छ।

बैंकसँग ऋण दिन सक्ने क्षमता बढेसँगै नयाँ औद्योगिक विकासको ढोका खोल्छ। कम ब्याज हुने र लगानीयोग्य रकम उपलब्ध हुने अवस्था आयो भने लगानीकर्ताले जोखिम लिएर लगानी बढाउन सक्छ। लगानी बढ्नु भनेको अर्थतन्त्र सकारात्मक योगदान पुग्नु हो।

यसैगरी व्यापारिक फर्महरूले गर्ने आयातको हकमा युसान्स प्रतितपत्रको विद्यमान अवधि १२० दिनबाट बढाएर १८० दिन कायम गर्ने व्यवस्थाले व्यापारमा पनि सहजता दिन्छ। यसले मेरो विचारमा समग्ररूपमा राम्रो गति दिन्छ।

बजेटले मलिनता मेट्न सकेको थिएन, मौद्रिक नीतिले उज्यालो ल्याउँछ भन्ने अपेक्षा गरेका छौं।