काठमाडौं– स्वास्थ्य व्यवसायी कैलाश खड्काले वैदेशिक रोजगार बोर्डको विज्ञ सदस्यबाट राजीनामा दिएका छन्। चौतर्फी विरोध भएपछि व्यवसायी खड्काले विज्ञ सदस्यबाट राजीनामा दिएका हुन्।
श्रम, रोजगार तथा सामाजिक सुरक्षामन्त्री रामेश्वर राय यादवले असार १८ गते व्यवसायी खड्कालाई बोर्डको विज्ञ सदस्यको रुपमा नियुक्त गरेका थिए। खड्काको नियुक्तिसँगै मन्त्री यादवको चौतर्फी आलोचना भएको थियो।
रोजगारीका लागि मलेसिया जाने कामदारसँग अर्बौं रकम ठगी गरेको आरोप लागेका खड्कालाई बोर्डजस्तो संवेदनशील कार्यलयको विज्ञ सदस्यमा मनोनित गरिएको भन्दै विरोध भएको थियो।
चौतर्फी विरोधसँगै मन्त्री यादवले खड्कालाई बोर्डको सदस्यमा नियुक्ति गर्ने निर्णय फिर्ता लिने तयारी गरेका थिए। मन्त्री यादवले सदस्य पदमा नियुक्ति गर्ने निर्णय फिर्ता लिनुअगावै खड्का आफैंले राजीनामा दिएका हुन्।
मन्त्री यादवले विज्ञ सदस्यका रुपमा खड्कासँगै व्यवसायी हेम गुरुङलाई समेत मनोनित गरेका थिए। गुरुङले पनि यसअघि नै राजीनामा दिइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
