काठमाडौं– श्रम, रोजगार तथा सामाजिक सुरक्षा मन्त्रालयले आन्तरिक रोजगारी व्यवस्थापनका लागि राष्ट्रिय रोजगार प्राधिकरण स्थापनाको तयारी थालेको छ। मन्त्रालयमा आइतबार रोजगार प्राधिकरण गठन गर्न आवश्यक प्रारम्भिक अवधारणा पत्रमाथि छलफल भयाे।
सो अवधारणा पत्रमाथि धारणा राख्दै कर्मचारीहरुले सम्बन्धित सरोकारवालाहरुसँग थप छलफल गरी आवश्यकता र औचित्यका आधारमा प्राधिकरण स्थापना गर्न सकिने बताएका छन्। प्राधिकरण स्थापनाका लागि तयार गरिएको अवधारणा पत्रमा रोजगारी सिर्जना र उपलब्ध रोजगारीको प्रभावकारी व्यवस्थापनसँगसँगै दिगो र समावेशी आर्थिक वृद्धिलाई जोड दिइएको छ।
प्राधिकरणले नेपालका लागि र नेपाल बाहिर रोजगारीका अवसरबारे अध्ययन अनुसन्धान गर्ने, रोजगारी खोज्ने र रोजगारी प्रदायकहरुको अनुगमन गर्न सूचना तथ्यांक बैंकको स्थापनाका लागि काम गर्ने अवधारणा पत्रमा उल्लेख गरिएको छ। बेरोजगारहरुको तथ्यांक अध्यावधिक गर्ने, दक्ष श्रम शक्तिको विकास, वैदेशिक रोजगारीबाट फर्किएका श्रमिकहरुको सीप र पुँजी देशभित्रै परिचालनलगायत काम प्राधिकरणले गर्ने उल्लेख गरिएको छ।
प्रस्तुत अवधारणा पत्रमाथि धारणा राख्दै मन्त्रालयका सहसचिव उमेश ढुंगानाले नेपालमा आन्तरिक रोजगारी व्यवस्थापनका लागि छुट्टै संयन्त्र नभएकाले स्वतन्त्र रुपमा सञ्चालन हुने गरी प्राधिकरण स्थापना गर्न सकिने बताए। प्राधिकरण स्थापनाको औचित्य तथा प्राधिकरणको काम र कर्तव्य स्पष्ट हुनुपर्ने उनको भनाई छ।
मन्त्रालयका अर्का सहसचिव रामचन्द्र ढकालले सरकारले यस वर्षको वार्षिक कार्यक्रममै रोजगार प्राधिकरणको स्थापना गर्ने व्यवस्था गरेकाले यसबारे थप छलफल गरी औचित्य र आवश्यकताका आधारमा प्राधिकरण स्थापना गर्न सकिने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
