काठमाडौं- नेपाल टेलिकमको जिएसएम पोस्टपेड सेवाअन्तर्गत दिइने विभिन्न भ्वाईस, एसएमएस तथा डाटा प्याकमा ठगी भएकाे भन्दै वाणिज्य, आपूर्ति तथा उपभोक्ता संरक्षण विभागमा उजुरी परेको छ। विभिन्न प्याक लिइसकेपछि पनि मुख्य ब्यालेन्स काटेको भन्दै उजुरी परेपछि विभागले यसबारे अध्ययन गरेको छ।
विभागका सहप्रवक्ता तथा अनुसन्धान अधिकृत ध्रुव खनालले उपभोक्ताबाट आएको उजुरीका विषयमा नेपाल टेलिकमसँग जानकारी लिइसकेको बताए। ‘मैले प्याक लिँदा प्याकबाट नभई मेन ब्यालेन्सबाटै पैसा काटेको भन्ने बेहाेराकाे उजुरी आएको थियो। हामीले नेपाल टेलिकमको इन्जिनियरलाई बोलाएर यस विषयमा जानकारी लिएका छौं,’ उनले भने।
टेलिकमसँग सोधपुछ गरिसकेपछि वाणिज्य विभागले उपभोक्ता ठगीमा परेको नभई टेलिकमका सेवाबारे जानकारी नहुँदा समस्या देखिएको निष्कर्ष निकालेको छ। ‘टेलिकमसँग जानकारी लिइसकेपछि हामीले के पायौं भने टेलिकमले दुई तरिकाले प्याक उपलब्ध गराउने रहेछ। एउटा आन्तरिक (इन्टरनल) र अर्को बाह्य (एक्स्ट्रर्नल) प्याक दिइने रहेछ,’ खनालले भने। ‘पोस्टपेडबाट इन्टरनल प्याक लिँदा मासिक काटिने ३८७ रुपैयाँबाट प्याकको पनि पैसा काटिन्छ। त्यहि रकम भित्रैबाट कट्टी हुनेगरी प्याक खरिद गर्न पाइन्छ। तर विभिन्न अफरहरुअन्तर्गतका प्याकहरु इन्टरर्नल ब्यालेन्स अर्थात ३८७ भित्रबाट खर्च हुने होइन। त्योभन्दा बाहिरको अतिरिक्त ब्यालेन्सबाट काटिने हो।’
यस विषयमा विभागले टेलिकमलाई उपभोक्ताले बुझ्ने किसिमले सूचनाहरु प्रवाह गर्न भनेको छ। टेलिकमले दिने सेवाबारे उपभोक्ता जानकार नहुँदा अल्मलिएको र सेवा प्रयोग गर्न नजानेका कारण उपभोक्तालाई जानकार बनाउन टेलिकमलाई भनिएको हो। ‘इन्टरनल र एक्स्ट्रनल प्याक भनेको के हो? पोस्टपेडमा मासिक कति रुपैयाँ तिर्न पर्छ। रेन्टल चार्ज भनेर ३ सय रुपैयाँ र ८७ रुपैयाँ विभिन्न करका रकमहरुसमेत जोडेर कूल ३८७ रुपैयाँ मासिक रुपमा काटिनेलगायतका विषयमा उपभोक्तालाई जानकारी गराउनुपर्छ,’ सहप्रवक्ता खनाल भन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
