काठमाडौं- मेलम्ची खानेपानी आयोजनाको मुख्य सुरुङमा पानी पथान्तर गरेसँगै आयोजनाको उद्घाटन मिति तय हुने खानेपानीमन्त्री बिना मगरले बताएकी छन्। आइतबार बिहान ९ः४५ मा सिन्धुपाल्चोकको मेलम्ची खोलाबाट काठमाडौं ल्याउने सुरुङमा पानी पठाइएको थियो। सोही बारेमा जानकारी दिन आयोजित पत्रकारसम्मेलनमा मन्त्री मगरले यस्तो बताएकी हुन्।
मेलम्ची आयोजना एक किसिमले दन्तेकथा जस्तै भएकोमा अहिलेको सरकार र खानेपानी मन्त्रालयको टिमले आयोजनाको सुरुङमा पानी पथान्तरको काम गर्न सफल भएको उनको भनाइ छ। ‘आयोजनाबारेका विभिन्न टिकाटिप्पणीलाई चिर्दै हामी सुरुङमा पानी पठाउन सफल भएका छौं,’ उनले भनिन्, ‘पानी पठाएर परीक्षण सकिए लगत्तै आयोजनाको उद्घाटन मिति तोकिने छ।’
आयोजनाले हाल अस्थायी बाँध बनाएर मेलम्ची खोलाको पानी सुरुङमा पठाएको हो। मेलम्ची खोलाको पानी काठमाडौं उपत्यकामा ल्याउन बनाइएको २६ किलोमिटर सुरुङमा आइतबार पानी छोडिएपछि आयोजना नयाँ चरणमा प्रवेश गरेको सरकारको दावी छ। मेलम्ची आयोजनाले विभिन्न समस्या र चुनौतीहरु पार गर्दै काठमाडौंबासीको दुई दशकभन्दा लामो प्रतिक्षालाई सम्बोधन गर्ने क्रममा सुरुङमा पानी पथान्तरण गरेसँगै आजैका मितिदेखि आयोजना नयाँ चरणमा प्रवेश गरेको मन्त्रालयले जनाएकाे छ।
सुरुङको परीक्षणका लागि चाहिने सबै आवश्यक प्राविधिक तयारी सकिएको मेलम्ची खानेपानी विकास आयोजनाले जनाएको छ। अहिले परीक्षणका लागि प्राविधिक मापदण्डअनुसार प्रति सेकेन्ड २ सय ६० लिटरका दरले सुरुङमा पानी पठाइएको छ। प्रतिसेकेन्ड २ सय ६० लिटर पानी प्रवाह गर्दा २६ किलोमिटर सुरुङ भरिन करिब १५ देखि २० दिनसम्म लाग्ने प्राविधिक अनुमान छ। पूर्ण भरिएको सुरुङलाई करिब १० दिन यथास्थितिमा राखिनेछ र त्यसपछि पानी भरिएकै दरमा सुरुङ खाली गरिँदा पुन १५ देखि २० दिन लाग्ने आयोजनाका कार्यकारी निर्देशक त्रियश खत्रीले बताए।
सुरुङ खाली भएपछि सुरुङको अवस्थाको पूर्ण परीक्षण गर्न ७ दिन लाग्ने आयोजनाले जनाएको छ। त्यसबेला केही समस्या देखिएमा समाधान गर्ने र त्यसपछि नियमित रुपमा सुरुङमा पानी छाेडिने छ। यसरी सुरुङमा नियमित पानी छाेड्न करिब २ महिना लाग्ने बताइएकाे छ। इटालियन कम्पनी सिएमसीले बीचैमा काम छाेडेपछि आयोजनामा चिनियाँ कम्पनी सिनो हाइड्रोले काम गरिरहेको छ।
सरकारले भने अनुसार मेलम्चीको पानी असारमै सुन्दरीजल आइहाले पनि उपभोक्ताले तत्कालै मेलम्चीको पानी पाउने अवस्था छैन। मेलम्चीको पानी वितरण गर्न सहरका धेरै भागमा नयाँ लाइन जोडिएका छन्। आठवटा नयाँ ट्यांकीमा पानी पुर्यापउन ठूला पाइपहरू जोडिएका छन्। आयोजनाको ट्याङ्की र वितरण पाइपलाइनको सफाइ एवं परीक्षण गर्न नै तीन महिनाभन्दा बढी समय लाग्ने अनुमान छ। चक्रपथ आसपासका एकतिहाइ क्षेत्रमा पुरानै पाइपबाट मेलम्चीको पानी वितरण हुनेछ। सरकारले आयोजनाको दोस्रो चरणको निर्माण कार्य सुरु गर्न आगामी वर्ष ५ अर्ब ४६ करोड रुपैयाँ छुट्याएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।