काठमाडौं– सरकारले कोरोना संक्रमण नफैलियोस् भन्दै लकडान गरको एक सय दिनभन्दा बढी भइसकेको छ। अझै पनि लकडाउन जारी नै छ। केही खुकुलो गरिए पनि लकडाउन भने साउन ७ गतेसम्म नै रहने छ।
लकडाउनसँगै बन्द भएको अन्तर्राष्ट्रिय तथा आन्तरिक उडान अहिले पनि बन्द नै छ। तर, उद्धार उडान भने भइरहेको छ। विमानस्थल बन्द भएको बेला पनि नेपाल नागरिक उड्डयन प्राधिकरणले विमानस्थल विस्तारको काममा तिव्रता दिएको छ। लकडाउनकै समयमा विमानस्थलमा ३ सय मिटर रन वे विस्तारको काम सम्पन्न भएको छ।
लकडाउनकै बेला त्रिभुवन अन्तर्राष्ट्रिय विमानस्थल स्तरोन्नति तथा विस्तारतर्फ दक्षिणतर्फ बेल्ट नम्बर १ तर्फ थप २ वटा वाइडबडी जहाज पार्किङ गर्न मिल्ने गरी एप्रोन निर्माण सम्पन्न भएको छ। योसँगै अब त्रिभुवन अन्तर्राष्ट्रिय विमानस्थलमा ५ वटा वाइडबडीस्तरका जहाज पार्किङ गर्न सकिने भएको छ। जहाज पार्किङ क्षमता बढेसँगै आकाशमा जहाज होल्ड गर्नुपर्ने समयमा कमी आउने प्राधिकरणका महानिर्देशक राजन पोखरेलले जानकारी दिए। लकडाउन अगाडि पार्किङ वे विस्तारको काम ८० प्रतिशत मात्रै भएको थियो।
यसैगरी लकडाउनकै समयमा दक्षिणतर्फ थप ३ सय मिटर धावनमार्ग र ३ सय मिटर रन वे निर्माणको काम पनि सम्पन्न भएको छ। यो काम पनि लकडाउन अगाडि ८२ प्रतिशत मात्रै भएको थियो। महानिर्देशक पोखरेलका अनुसार अन्तर्राष्ट्रिय प्रस्थानतर्फ टर्मिनल भवन (स्टेरलाइज्ड हल) नयाँ निर्माण सम्पन्न भइ संचालनमा आएको छ।
यसैगरी, अन्तर्राष्ट्रियतर्फ प्रस्थान कक्षको टिकेटिंगतर्फ एक्सरे र ब्यागेज ह्याण्डलिंग बेल्ट राख्ने कार्य सम्पन्न भएको छ। प्राधिकरणका अनुसार लकडाउनकै समयमा आगमन कक्षतर्फ नयाँ आगमन कक्षको निर्माण सम्पन्न भएको छ र केही प्राविधिक विषय पुरा गरेपछि संचालन भएको छ। प्राधिकरणले समानान्तर ट्याक्सी वे निर्माणका लागि एशियाली विकास बैंकसँगको सम्झौतालाई अन्तिम रूप दिएको समेत पोखरेलले जानकारी दिए। लकडाउनकै समयमा प्राधिकरणले उत्तरतर्फ पार्किङ क्षेत्र विस्तारको ठेक्का लगाउने कार्य सम्पन्न गरको छ भने क्यानोपी थप गरी अन्तर्राष्ट्रिय टर्मिनलको क्षेत्र विस्तार गर्ने कार्य प्रारम्भ भएकाे छ। प्राधिकरणले जग्गाको मुआब्जा वितरण कार्य सुरू भएको पाखरेलले बताए।
यसैगरी, प्राधिकरणले लकडाउनकै बेलामा आन्तरिक विमानस्थलतर्फ पार्किङस्थल तथा ट्याक्सी वेमा कालोपत्रे स्तरीकरणको काम सम्पन्न भएको जनाएको छ।
संस्कृति, पर्यटन तथा नागरिक उड्डयन मन्त्रालय र प्राधिकरणले उडान सुरक्षामा कुनै सम्झौता हुन नदिन १३ वटा क्वीक रिफेन्स गाइटस लाइन्स र १० वटा एडभाइजरी जारी गरेको पोखरेलले जानकारी दिए। प्राधिकरणले वायुसेवा, विमानस्थल तथा अन्य उड्डयन सेवाले अपनाउनुपर्ने सुरक्षा तथा सावधानीका सम्बन्धमा समते सुरक्षा निर्देशिका जारी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751267101.jpg)
-1751273553.jpg)
-1749826086.png)
