पृथ्वी झुन्डिएको छ रुखमा
अन्तरिक्षमा घुमिरहेका छन् अरिङ्गालहरू।
रुख कटुस हो
रुख चिलाउने हो
रुख उत्तिस हो
रुख जेसुकैको होस्। त्यो पृथ्वीको टेको हो।
बोलीमा खिल नभएकाहरू
अरिङ्गालबाट लखेटिएर
पृथ्वीभन्दा तल झरेका छन्।
रुखको फेदमा उभिएका केटाकेटी
गुलेलीले पृथ्वी ताकेर उभिएका छन्।
टुप्पोबाट झारेर भुइँमा
उनीहरु चाहन्छन् पृथ्वीको भकुन्डो खेल्न।
भकुन्डो बनाउन अरिङ्गालको गोलो।
अरिङ्गालहरू अन्तरिक्षमा फन्को मारिरहेका छन्।
केटाकेटीहरू पृथ्वीमै उभिएका छन्
तर रुखमाथि
कसैले झुन्डाएको छ अर्को पृथ्वी। यो पृथ्वीको विभाजन हो।
शासकहरूको झैँ
अरिङ्गालहरूको पनि सिमाना हुन्छ।
केटाकेटीहरु अरिङ्गालको राज्यमा छन्।
केटाकेटीहरु गुलेली खेलिरहेका छन्।
अरिङ्गाल केटाकेटीतिरै आइरहेछन्।
अब केटाकेटीहरुले सिक्नेछन्
विद्रोहको गीत।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765860421.png)
-1764146706.png)
-1763721444.png)
-1765273665.jpg)
