काठमाडौँ- नेकपा अध्यक्ष एवम् प्रधानमन्त्री केपी ओली र अर्का अध्यक्ष पुष्पकमल दाहाल‘प्रचण्ड’बीच भएको चार घण्टा लामो संवादले विवादको गाँठो फुकाउन सकेन। शुक्रबार अध्यक्ष ओलीलाई भेट्न प्रचण्ड साढे बिहान ११ बजे बालुवाटार छिरेका थिए। करिब ४ घण्टासम्म एक आपसमा मन माझामाझ हुनेगरी लामो संवाद गरेपछि पुनः शनिबार स्थायी कमिटी अघि छलफल गर्ने गरी छुटेका छन्।
पार्टी बैठकमै प्रधानमन्त्री र पार्टी अध्यक्ष दुवैबाट ओलीको राजीनामा मागेपछि दुई अध्यक्षबीच तिक्तता बढेको हो। प्रतिकारमा ओलीले बिहीबार संसद् अधिवेसन अन्त्य गर्ने राष्ट्रपतिलाई सिफारिस गर्ने र त्यसको केही समयभित्रै राष्ट्रपतिले पनि अन्त्य गरेको पत्र संसद्लाई पठाउने काम भएपछि पार्टीभित्रको विवाद उत्कर्षमा पुगेको हो। संसद् अधिवेसन अन्त्य गरी प्रधानमन्त्री ओलीले पार्टी फुटाउन अध्यादेश ल्याउन खोजेको भन्दै अध्यक्ष प्रचण्डसहित नेताहरु त्रसित भएका थिए।
शुक्रबार पार्टी एकतामा महत्पूर्ण भूमिका खेलेका महासचिव विष्णु पौडेल र स्थायी कमिटी सदस्य जनादर्न शर्मालाई समेत संवादमा लगिएको थियो। छलफलमा अध्यक्ष ओलीले पौडेललाई सहभागी गराएका थिए भने अर्का अध्यक्ष प्रचण्डले शर्मालाई सहभागी गराएका थिए। बालुवाटारमा छलफल चल्दाचल्दै कतिपय अवस्थामा ओली प्रचण्डको संवाद उत्कर्षमा पुगेको बालुवाटार स्रोतले जनायो।
‘अध्यक्ष प्रचण्डले अहिलेकै अवस्थामा अघि बढ्न सकिँदैन। यो तरिकाले पार्टी र सरकार पनि चल्दैन। कि यसअघि मंसिर ४ गतेको सहमति रिभ्यू गरौँ। होइन भने अर्को सहमति गरौं भन्नुभयो,’ प्रधानमन्त्री ओलीलाई उद्धृत गर्दै बालुवाटार स्रोतले भन्यो, ‘जवाफमा ओलीले सहमति नगर्ने कहाँ भनेको छु र! सहमति गरौँ के गर्ने हो तयारै छु भन्नुभयो।’
छलफलमा अध्यक्ष ओली-प्रचण्डबीच एकआपसमा कमजोरी औंल्याउनेसम्मका कुराकानी भएको स्रोतले जनाएको छ। प्रचण्डले सरकारको समर्थनमा सडकमा युवाहरुलाई उतार्नु ठिक नभएको भन्दै ओलीसमक्ष आक्रोश पोखेका थिए। आफैले कमजोरी गर्दै जाने त्यसैमा उल्टै युवाहरुलाई सडकमा उतार्नु ठिक नभएको प्रचण्डले भनेका थिए।
प्रचण्डले बोलेलगत्तै ओलीले सरकारले नक्सा जारी गरेर यति धेरै राष्ट्रियताको पक्षमा काम गरेको छ, त्यो नदेख्ने एकहोरो आलोचना मात्रै गर्ने प्रवृत्ति पनि ठिक नभएको भन्दै गुनासो पोखेका थिए। यसरी बैठकमा एकजुट भएर मेरा विरुद्ध लाग्नु ठिक नभएको भन्दै बताउँदै ओलीले परिस्थितको आँकलन गरी तथ्यमा गएर आलोचना गर्नुपर्ने बताएका थिए।
छलफलकै क्रममा ओलीले प्रधानमन्त्री र पार्टी अध्यक्ष दुवै पद नछोड्ने र छाड्नै परे दाेस्राे पुस्तालाई अघि सार्ने प्रस्ताव गरेका थिए।
एकआपसमा चर्काचर्की भएपछि अन्तमा सहमति गरेर अघि बढ्नुका विकल्प छैन भन्ने निष्कर्षमा दुवै अध्यक्ष पुगेको स्रोतले जनाएको छ। नयाँ समझदारीका लागि शनिबार स्थायी कमिटी बैठकअघि फेरी छलफल गर्नेगरी प्रचण्ड बालुवाटारबाट निस्किए।
शुक्रबारको छलफलमा अध्यक्ष ओली प्रचण्डले समझदारी गरेर अघि बढ्ने भनिएपनि मूर्त रुप नलिएको बताएको छ।
अध्यक्षद्वयको छलफलपछि प्रचण्ड निवास खुमलटारमा प्रचण्डले माधवकुमार नेपाल, झलनाथ खनाल, बामदेव गौतमलगायतका नेताहरूसँग प्रधानमन्त्री ओलीसँग भएको भेटबारे ब्रिफिङ गरेका थिए। सो ब्रिफिङमा नारायणकाजी श्रेष्ठ र जनार्दन शर्मा पनि उपस्थित भएको खुमलटार स्रोतले जानकारी दिएको छ। प्रधानमन्त्री ओलीले दुवै पद नछाड्ने अडान लिएकाे ब्रिफिङका क्रममा प्रचण्डले बताएका थिए।
पार्टी एकताको पक्षमा दोस्रो र तेस्रो तहका नेताहरू सक्रिय
एकतामा गम्भीर धक्का लागेको भन्दै नेकपा दोस्रो र तेस्रो तहका नेताहरु सक्रिय भएका छन्। विवादबाट समाधान खोज्ने भन्दा फुटको संघारमा जान नहुने भन्दै एकताको पक्षमा नेताहरु सक्रिय भएका हुन्।
शुक्रबार बिहान स्थायी कमिटी सदस्य घनश्याम भुसालले ११ जना दोस्रो तहका नेताहरुलाई बोलाएर छलफल गरेएका थिए। मन्त्रिनिवास पुल्चोकमा ११ जना नेताहरुले पार्टी एकताको पक्षमा अध्यक्ष ओली प्रचण्डलाई दबाब दिने निर्णय गरेका थिए।
बैठकमा टोपबहादुर रायमाझी, शक्तिबहादुर बस्नेत, योगेश भट्टराई, देवेन्द्र पौडेल, मणि थापा, विष्णु रिमाल, प्रदीप ज्ञवाली, सुरेन्द्र पाण्डे, संकर पोखरेललगायत नेताहरु सहभागी भएका थिए।
लगत्तै दिउँसो पार्टी फुटाउन पाईंदैन भन्दै केन्द्रीय कार्यालय धुम्बाराहीमा केन्द्रीय सदस्यहरुले पार्टी धर्नामा बसेका थिए। पार्टी फुटाएर हजारौँ नेता कार्यकर्ता र जनमतको अपमान गर्न नहुने नेताहरुले बताएका थिए। धर्नामा केन्द्रीय सदस्य ठाकुर गैरे, रामकुमारी झाँक्री, लेखनाथ न्यौपाने, कृष्ण केसी,अजम्बर काङबाङ राई लगायत सहभागी भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789033975.jpg)
-1789031457.png)
-1786602170.png)
