काठमाडौं- नेपाल रेडक्रस सोसाइटी र काेकाकाेला नेपालले काेराेना भाइरस (कोभिड– १९) महामारीकाे कारण संकटमा रहेका बिरामीहरुको सहयोगार्थ अग्रपंतिमा खटिने स्वास्थ्यकर्मी र स्वयंसेवकहरुको सुरक्षा अभिवृद्धिको लागि साझेदारी गरेका छन्। यस प्रोजेक्टको लक्ष्य देशभरका सातवटै प्रदेशका प्रमुख सार्वजनिक अस्पतालका स्वास्थ्यकर्मीहरु तथा अग्रपंतिका स्वयंसेवका लागि सुरक्षा सामग्री र निस्संक्रामक वस्तुहरु उपलब्ध गराउने रहेको छ।
यस परियोजनाको समग्र उद्देश्य कोभिड– १९ को जोखिममा रहेका डाक्टर, नर्स, रक्त टेक्निशियनहरु, एम्बुलेन्स ड्राइभर, मेडिकल टेक्निशियन, क्वारेन्टाइन केन्द्रका मानिसहरु तथा समुदायका सदस्यहरुसहित करिब ६० हजारलाई सेवा पुर्याउने रहेको छ।
असार १६ गते स्वास्थ्य तथा जनसंख्या मन्त्रालय परिसरमा मन्त्री भानुभक्त ढकाल, कोकाकोला नेपाल र नेपाल रेडक्रसका प्रतिनिधिहरुले यो परियोजनाको सुरु गरेका थिए। पहिलो चरणको सुरक्षासामग्रीहरु र स्वास्थ्य सामग्रीहरु मन्त्री ढकालले शुक्रराज ट्रपिकल तथा सरुवा रोग अस्पताल टेकुका निर्देशक डा सागरकुमार राजभण्डारीलाई हस्तान्तरण गरेका हुन्।
पहिलो चरणमा हस्तान्तरण हुने सामग्रीहरुमा १५ हजार थान सर्जिकल मास्क, के–९५ माक्स एक हजार १ सय ५० थान, ५५० थान हुडको साथ डिस्पोजेबल कभर्अल, सुरक्षा चस्मा ३०० वटा, १० हजार जोडी पञ्जा, ४४० थान सुरक्षा बुट, स्यानिटाइजर २५ सय बोटल, निर्मलीकरण केमिकल सोडियम हाइपोक्लोराइड ४५० र १५ हजार १ सय १० थान साबुन रहेका छन्। आगामी २ साताभित्र सबै सामग्रीहरु वितरण भइसक्नेछन्।
तीव्र गतिमा फैलिइरहेको कोभिड– १९ महामारीको परिस्थितिमा संक्रमण रोकाथाम र नियन्त्रणमा नेपाल रेडक्रसले स्वास्थ्य, सरसफाई, जोखिम सञ्चार, सामुदायिक संलग्नता, संरक्षण तथा क्वारेन्टाइन सहयोगलगायत विभिन्न क्षेत्रमा सरकार, स्थानीय तह, स्थानीय समुदाय, रेडक्रसका विभिन्न निकायहरु, दाता र साझेदारसँग मिलेर काम गरिरहेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।