काठमाडौं- नागरिक लगानी कोषले प्रवर्द्धन गरेको नागरिक स्टक डिलर कम्पनीले प्रमुख कार्यकारी अधिकृत (सिइओ) नियुक्तिको प्रक्रिया अघि बढाएको छ। कम्पनीले बिहीबार सूचना प्रकाशित गर्दै १५ दिनभित्र आवेदन दिन इच्छुक व्यक्तिलाई आग्रह गरेको छ।
वाणिज्य, अर्थशास्त्र, व्यवस्थापन वा वित्तशास्त्रमा स्नातकोत्तर वा चार्टर्ड एकाउन्टेन्टसहित स्नातक गरेका व्यक्तिले आवेदन दिन पाउनेछन्। बैंक तथा वित्तीय संस्था वा धितोपत्र बजारमा सूचीकृत भएको संस्था वा उद्योग, वाणिज्य वा धितोपत्र बजारको क्षेत्रमा लेखा वा वित्त व्यवस्थापन सम्बन्धी कम्तिमा ४ वर्ष काम गरेको वा व्यवस्थापकीय तहमा बसेको व्यक्तिले आवेदन दिन सक्छन्।
इच्छुक व्यक्तिले निवेदनका साथ व्यावसायिक योजना तथा कार्ययोजना पनि प्रस्तुत गर्नुपर्ने छ। नागरिक लगानी कोषले स्टक डिलरको काम गर्न कम्पनी स्थापना गरी काम अघि बढाउने तयारी गरेसँगै सिइओ नियुक्तिको प्रक्रिया पनि अघि बढाएको हाे।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।