गफ हानेको होइन भन्दै गफ हान्छौ
अपेक्षा अनुसारको काम त गरेनौ गरेनौ
अब त तिम्रो भाषा पनि अत्ति भयो
इनफ इज इनफ
इनफ इज इनफ।
जनता सडकमा रोइरहेका छन्
सडकसम्म आउन नसकेकाहरू चिच्याइरहेछन्,
औषधिमा तिमीले भ्रष्टाचार गरेकाले
आफ्नो हत्यारा आफै बनिरहेका छन्
औषधि खाने रहर गरेकाहरू जहर पिइरहेका छन्
मलाई तीर हान्दैमा फुर्सद छैन तिमीलाई
म बाँच्ने कोसिसमा छु
तिमी मरेपछि स्वर्ग पुर्याउँछु भन्छौ
भो! परेन मलाई स्वर्ग जान
सक्छौ मलाई बचाऊ
औषधि खुवाऊ
अब मलाई तिमी सुध्रिएको हेर्न मन छ
सुध्रन सकेनौं भने पनि
तिम्रा अझै कुकृत्य हेर्न मन छ
अझै तिम्रो कर्तुत खोतल्न मन छ
त्यसकै कविता लेख्न मन छ
बिन्ती तिमी कविता फुराउनेभन्दा
काममा जोड गर
म नै लेखुँला कविता
टाढैबाट।
'ढुक्क रहौं, मुलुक बन्छ' भन्छौ
तर सिन्को नभाँचे कसरी बन्छ देश?
'प्रविधि घरघरमा पुग्छ' भन्छौ
कुन घरमूलीको कुरा गर्छौ?
मेरो घरमा त कुनै परिवर्तन देखिन्न!
सुपथ मूल्यमा सामान र औषधि दिँदैनौ
र मात्रै दिन्छौ गफ!
अब त अत्ति भयो
इनफ इज इनफ,
इनफ इज इनफ।
जतिजति कोरोना संक्रमित बढ्छन्
उतिउति कमिसन थन्क्याउने
ठूलाठूला भण्डार खोज्छौ तिमी
तिम्रो पनि कान चिरेकै रेहछ महान् ज्यू
किन दिन्छौ गफ?
अब त अत्ति भयो
इनफ इज इनफ,
इनफ इज इनफ।।
भूगोलमा सानो देश भएपनि
त्योभन्दा धेरै विशाल छ हाम्रो छाती
तर तिम्रो त विचार पनि
झिँगाको टाउको जत्रो पनि रहेनछ
तिम्रो भाषणलाई धिक्कार
अझै लाज लाग्दैन तिमीलाई?
सक्दैनौ भने छोड सरकार
हरेक नेपालीलाई जिउन पाउने
जन्मसिद्ध संवैधानिक अधिकार छ हामीलाई
कृपया खोस्ने दुष्प्रयास नगर।
इनफ इज इनफ
इनफ इज इनफ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।