काठमाडौं- अर्थमन्त्री डा. युवराज खतिवडाले विद्युतीय गाडीलाई दिएको प्रोत्साहनअनुसार परिणाम नआएपछि कर बढाएको बताएका छन्। खतिवडाले बजेटका बारेमा शुक्रबार गरेको पत्रकार सम्मेलनमा बोल्ने क्रममा पेट्रोलियम खपत कम गर्नका लागि विद्युतीय सवारी साधन आयात खुकुलो पारिएको थियो।
तर महँगा महँगा विद्युतीय गाडीहरू आयात भएपछि कर बढाएको उनले स्पष्टीकरण दिँदै भने‚ 'दुई वर्षको पेट्रोलियम आयात धान्ने पैसा विद्युतीय गाडी आयातमा जान थाल्यो। त्यसैले सरकार महँगा विद्युतीय कारमा कर बढाउन बाध्य भयो।' तर सस्ता मूल्यमा कर नबढाइएको उनले दाबी गरे।
खतिवडाले आगामी आर्थिक वर्षको बजेट मार्फत इलेक्ट्रिक तथा हाइब्रिड कारमा ८० प्रतिशतसम्म भन्सार र अन्त:शुल्क लाग्ने व्यवस्था नयाँ आर्थिक ऐनमा समावेश गरेका थिए। यसअघि विद्युतीय सवारीमा सामान्य कर लगाएको सरकारले नयाँ आर्थिक ऐनमार्फत् व्यापक कर लगाएको छ।
विद्युतीय मोटरबाट धक्का दिने चारपांग्रे गाडीमा ३० प्रतिशत भन्सार र ५ प्रतिशत अन्त:शुल्क लगाइएको छ। विद्युतीय मोटरबाट धक्का दिने तीन पांग्रे सवारीमा ३० प्रतिशत भन्सार र ५ प्रतिशत अन्त:शुल्क लगाएको छ।
५० किलोवाटसम्मको कारमा ८० प्रतिशत भन्सार र ३० प्रतिशत अन्त:शुल्क लगाइएको छ। त्यस्तै मोटरको पिकपावर ५० देखि १०० किलोवाट ननाघेको कारमा ८० प्रतिशत भन्सार र ४० प्रतिशत अन्त:शुल्क लगाइएको छ।
१ सयदेखि १ सय ५० किलोवाटसम्मका कारमा भन्सार ८० प्रतिशत र ५० प्रतिशत अन्त:शुल्क लगाइएको छ। १ सय ५० देखि २ सयसम्ममा ८० प्रतिशत भन्सार र ६० प्रतिशत अन्त:शुल्क लाग्ने व्यवस्था गरिएको छ। २ सयदेखि ३ सयसम्ममा ८० प्रतिशत भन्सार र ७० प्रतिशत अन्त:शुल्क लगाइएको छ। त्यसैगरी ३ सयभन्दा बढी किलोवाटका कारमा ८० प्रतिशत भन्सार र त्यति अन्त:शुल्क नै भन्सार लाग्ने व्यवस्था बजेटमा गरिएको छ।
पिस्टन इन्जिन र धक्का दिने विद्युतीय मोटर दुवै भएको, विद्युत शक्तिको बाह्य स्रोतमा प्लग जोडेर चार्ज हुन सक्नेबाहेकका सवारीमा 'अनएसेम्बल' अवस्थामा ८० प्रतिशत भन्सार र ६० प्रतिशत अन्त:शुल्क लाग्ने व्यवस्था गरिएको छ।
पिस्टन इन्जिन (डिजेल र हाइब्रिड) र धक्का दिने विद्युतीय मोटर दुवै भएको, विद्युत शक्तिको बाह्य स्रोतमा प्लग जोडेर चार्ज हुनसक्ने किसिमका कारमा ८० प्रतिशत भन्सार र ६० प्रतिशत अन्त:शुल्क लाग्ने व्यवस्था नयाँ आर्थिक ऐनमा गरिएको छ। धक्का दिने विद्युतीय मोटरमात्र भएको कारमा ८० प्रतिशत भन्सार र ४० प्रतिशत अन्त:शुल्क लाग्ने व्यवस्था गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
