काठमाडौं- चालु आर्थिक वर्ष २०७६/७७ को १० महिना अवधिमा नेपालले कुल ११ खर्ब ७ अब २० करोड रुपैयाँ बराबरको वैदेशिक व्यापार गर्दा ९ खर्ब ४३ अर्ब ७ करोड ३० लाख रुपैयाँ बराबर व्यापार घाटा व्यहोरेको छ।
भन्सार विभागको तथ्यांकअनुसार वैशाख मसान्तसम्ममा १० खर्ब २५ अर्ब १३ करोड ७७ लाख ८३ हजार रुपैयाँ बराबरको वस्तु तथा सेवा आयात गर्दा ८२ अर्ब ६ करोड ४७ लाख रुपैयाँ बराबरको वस्तु तथा सेवामात्रै निर्यात भएको छ। यो अवधिमा नेपालले गरेको आयात–निर्यातको अनुपात १२ दशमलव ४९ प्रतिशत छ। कुल वैदेशिक व्यापारमा निर्यातको हिस्सा ७ दशमलव ४१ प्रतिशत छ भने आयातको हिस्सा ९३ दशमलव ७५ प्रतिशत बराबर छ।
कोभिड- १९ रोकथामका लागि पछिल्लो २ महिनायता लागू गरिएको लकडाउनका कारण वैदेशिक व्यापारमा पनि कमी देखिएको छ। चालु आर्थिक वर्षको पहिलो १० महिना अवधिमा नेपालले गरेको कूल वैदेशिक व्यापार पछिल्लो आर्थिक वर्षको सोही अवधिको तुलनामा ११ दशमलव ८९ प्रतिशतले कम हो।
त्यस्तै आर्थिक वर्ष २०७५/७६ को पहिलो १० महिना अवधिको तुलनामा आर्थिक वर्ष २०७६/७७ को सोही अवधिमा आयात १२ दशमलव ९९ प्रतिशतले घटेको छ भने निर्यात ४ दशमलव ५० प्रतिशतले बढेको छ।
लकडाउनपछिको २ महिना अवधिमा मात्रै आयात १०.२७ र निर्यात १७.८५ प्रतिशत बिन्दुले घटेको भन्सार विभागले जनाएको छ। गत फागुन मसान्त सम्ममा अघिल्लो आर्थिक वर्षको तुलनामा आयात २ दशमलव ६२ प्रतशितले घटेको थियो भने निर्यात २२ दशमलव ३५ प्रतिशतले बढेको थियो। तर वैसाख मसान्तसम्ममा आइपुग्दा आयात १२ दशमलव ९९ प्रतिशतले घटेको छ भने निर्यात ४ दशमलव ५० प्रतिशले मात्रै बढेको देखिन्छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।