काठमाडौं- ‘६ दिन पहिले स्वाब संकलन गरेर पठाएका थियौँ, अहिले २१ जनामा कोरोना देखिएको खबर आएको छ, अब ४० जनालाई अस्पताल पठाउँदै छौँ’ यो भनाइ हो महागढीमाई नगरपालिकाका मेयर उपेन्द्रप्रसाद यादवको।
सोमबार बिहान स्वास्थ्य मन्त्रालयले सार्वजनिक गरेको तथ्यांकमा सबैभन्दा धेरै एकैपटक बाराको गढीमाईमा २१ जना संक्रमित भएको पुष्टि भएको थियो। यसरी संक्रमितहरुलाई कलैया अस्पतालको आइसोलेसनमा पठाउने तयारी भइरहेको मेयर यादवले बताएका छन्।
देशभर ७५ जना थपिँदा सोमबार गढीमाईका १८ वर्षदेखि ५० वर्षसम्मका रहेका २१ जनामा कोरोना संक्रमण देखिएको थियो। १८ वर्षका ४ जना, १९ वर्षका २ जना, २० वर्षका तीन जना, २४ वर्षका २ जना, २५ वर्षका तीन, ३६ वर्षका २, २६, ३०, ३१, ४० र ५० वर्षका एक–एक जनामा संक्रमण पुष्टि भएको थियो।
बाराकै कलैया नगरपालिकामा दुई जनामा पनि संक्रमण पुष्टि भएको थियो। योसँगै बारामा कोरोना संक्रमतिको संख्या ३५ पुगेको छ। कुल संक्रमितको आधा भन्दा धेरै गढीमाई नगरपाकिलामा देखिएको पुष्टि भएपछि मेयर यादव त्रासमा रहेका छन्।
उनले बिहानै प्रमुख जिल्ला अधिकारी रुद्रप्रसाद पण्डितलाई फोन गरेर संक्रमितहरुलाई कुन अस्पताल पठाउने, क्वारेनटाइनमा रहेकाहरुको परिक्षण बढाउन र क्वारेनटाइनमा रहेकाहरुलाई थप सुविधा दिने बारेमा गुनासो गरेका छन्।
नगरपालिकाले अहिले चार वटा क्वारेनटाइन सञ्चालन गरिरहेको छ। जहाँ ५३ जना रहेका छन्। क्वारेनटाइनमा रहेकाहरु भारतको मुम्बई, हरियाणा र दिल्लिबाट फर्केका नेपाली छन्। भारतमा रेल चलेपछि वेलडाँगी नाकाबाट छिरेका नगरका उनीहरुलाई नगरपालिकाले गाडी रिर्जभ गरेर ल्याउँदै क्वारेनटाइनमा राखेको उनले बताए।
नगरले वडा नम्बर १, २, ३ र ६ मा क्वारेनटाइन चलाइरहेको उनले बताए। ६ नम्बर वडामा रहेका ३८ जना मध्ये धेरैजसो ८ दिन पहिले भारतबाट आएका थिए। दिल्ली, मुम्बई, हरियाणबाट आएका उनीहरु एकै ठाउँमा बस्दै आएका छन्।
‘वडा नम्बर १ को क्वारेनटाइनमा रहेका ४० जनामध्ये ३० जनाको परीक्षण गरिएको थियो त्यसमा २१ जनामा कोरोना पुष्टि भएको छ’, मेयर यादवले भने ‘६ दिनपछि रिर्पोट आएकाले अब बाँकीलाई कोरोना संक्रमण भएन होला त?’
‘६० वटा परीक्षण किट मागेका थियौँ, ३० वटा मात्र आयो’, मेयर यादवले भने ‘अब अरु कहिले आउँछ अनि परिक्षण गर्ने हो, त्यसैले सरकारले छिटो छिटो परीक्षण गर्ने व्यवस्था गर्न जरुरी भयो।’ भारतबाटट दैनिक म मानिस आउनेक्रम वृद्धी भइरहेकाले अबका दिन झन संकट हुने अवस्था आउन सक्ने उनले बताए।
‘भारतसँग खुल्ला वोर्डर छ। आज पनि केही मानिस थपिएका छन्’, उनले भने ‘परीक्षण छिटो भए पो संक्रमित र संक्रमण नभएकाहरुलाई अलग अलग राख्नु हुन्थ्यो नत्र सबैलाई एकै ठाउँमा राख्नुपर्दा जोखिम झन बढ्यो।’
मान्छे थपिइरहेका कारण नगरले क्वारनेटाइन बढाउनेतर्फ काम अघि बढाएको उनले बताए। अहिले प्रत्येक वडामा क्वारेनटाइन बनाउने काम चलिरहेको उनको भनाइ छ। ‘अस्थायी भए पनि अस्पताल बनाउन सम्भव छैन त्यसैले नगरले सक्दो सुविधायुक्त ५०० वेडका क्वारेनटाइन विस्तार गर्ने योजना बनाएको छ, यसका लागि वडाहरुका स्कुल खाली गराइएको छ’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
