अगाडि बाटो, पछाडि साथी
अगाडि बढूँ साथी छुट्ने
पछाडि सरूँ बाटो छुट्ने
खै के गर्ने?
अगाडि राष्ट्रियता, पछाडि छिमेकी
अगाडि बढूँ छिमेकी रूठ्ने
पछाडि सरूँ नक्सा कुच्चिने
खै के गर्ने?
अगाडि वैदेशिक रोजगार, पछाडि परिवार
अगाडि बढूँ परिवार छुट्ने
पछाडि सरूँ गरिबी बढ्ने
खै के गर्ने?
अगाडि फुर्ति, पछाडि कुर्सी
अगाडि बढूँ कुर्सी छुट्ने
पछाडि सरूँ जनताले कुट्ने
खै के गर्ने?
अगाडि माहामारी,पछाडि कमिसन्
अगाडि बढूँ, कमिसन छुट्ने
पछाडी सरूँ, माहामारी नियन्त्रण नहुने
खै के गर्ने?
अगाडि न्याय, पछाडि घुस
अगाडि बढूँ महँगीले चुट्ने
पछाडि सरूँ आत्मा पोल्ने
खै के गर्ने?
मनका यी दोधार
गाह्रो रहेछ गर्न वारपार
मानव र दानव सबैमा बस्ने
खै के गर्ने?
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।