डडेल्धुरा- डडेल्धुरा अस्पतालमा उपचार गराउन आएका एक युवकमा कोरोना संक्रमण पुष्टि भएपछि अस्पतालका ४ चिकित्सकसहित ७ जनालाई क्वारेन्टाइनमा राखिएको छ।
जिल्लाको परशुराम नगरपालिका–१० का २८ वर्षीय ती युवकमा शुक्रबार कोरोनाको संक्रमण रहेको पुष्टि भएको थियो। डडेल्धुरा अस्पतालमा स्क्रब टाइफसको उपचार गराउन आएका युवकलाई स्क्रब टाइफसको उपचार गरी घर फर्केका थिए। स्वाब सकंलन पश्चात युवकलाई घरमै आराम गर्न सुझाउँदै अस्पतालले घर पठाइएको थियो।
उक्त युवाको स्वाब सकंलन परीक्षणपछि कोरोना पोजेटिभ देखिएको थियो। स्वाब संकलनमा खटिएका चिकित्सक र अन्य स्टाफहरूलाई क्वारेन्टाइनमा राखिएको अस्पतालका निमित्त मेडिकल सुपरिटेन्डेन्ट डा जगदीशचन्द्र विष्टले जानकारी दिए।
‘ती युवकमा ज्वरो आएको थियो। हामीले त्यही बेला स्वाब संकलन गरेका थियौं। त्यो बेला उनमा स्क्रब टाइफस पोजेटिभ देखाएको थियो। हिजो कोरोनाको संक्रमण पुष्टि भएको छ’, निमित्त सुपरिटेन्डेन्ट विष्टले भने, ‘त्यसैले उहाँको उपचारमा संलग्न चिकित्सक र अन्य स्टाफहरूलाई अस्पातलकै क्वारेन्टाइनमा बसिरहनुभएको छ।’
शनिबार चार चिकित्सक र अन्य तीनजना स्टाफको थ्रोट स्वाब संकलन गरिने उनले जानकारी दिए। कोरोना संक्रमित युवकको स्वास्थ्य अवस्था सामान्य रहेको अस्पतालले प्रेस विज्ञप्तिमार्फत जनाएको छ।
यता उनी बस्ने सरकारी आवास सिल गरिएको र सो स्थानका ४० जनाको पनि थ्रोट स्वाब संकलन गरी परिक्षणका लागि धनगढी पठाइने स्वास्थ्य कार्यालय डडेल्धुराले जनाएको छ।
यसका साथै जेठ ७ गते यता डडेल्धुरा पुगेर क्वारेन्टाइनमा बसेकाहरुको नमुना संकलन सुरु गरिएको स्वास्थ्य कार्यालय डडेल्धुराले जनाएको छ। शनिबार भागेश्वर गाउँपालिका र परशुराम नगरपालिका करिब एक सय जनाको नमुना संकलन गरिने जनाएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
{{-- --}}