समाज

सुदुरपश्चिमको एक मात्र विशेषज्ञ अस्पतालमा पानी चुहिएपछि बिरामीको भागाभाग

ललित बोहरा शुक्रबार, वैशाख १२, २०७७ १५:५०

डडेल्धुरा- सुदुरपश्चिम प्रदेशको केन्द्रभाग डडेल्धुरा जिल्लामा रहेको संघीय सरकार अन्तरगतको सुदुरपश्चिम प्रदेशकै एकमात्र विशेषज्ञ अस्पताल (डडेल्धुरा अस्पताल)मा पानी चुहिने समस्या भएपछि बिरामीहरुको भागाभाग भएको छ। बिहीबार बेलुकीपख परेको पानीले अस्पतालको छाना चुहिएपछि अस्पतालमा बेडमा भर्ना रहेका बिरामीको भागाभाग भएको हो।

बिरामी रहेको वार्डको बेडमा बाहिरजत्तिकै पानी चुहिएपछि बिरामीलाई निकै समस्या भएको उनीहरुले गुनासो गरेका छन्। विशेषज्ञ अस्पतालका रुपमा रहेको डडेल्धुरा अस्पतालमा अहिले प्रदेशका ७ वटै पहाडी जिल्लाबाट बिरामी आउने गर्दछन्।

वार्डभित्रै पानी चुहिने समस्याका कारण करिब ६ वेडका बिरामीलाई अन्यत्र सारिएको छ। 'अस्पतालभित्रैका बेडमा नै पानी जमेपछि समस्या भएको छ। पानी छल्दै बेडमा बस्नु परिरहेको छ,' बिरामीका कुरुवा महेन्द्र धनाडीले भने, 'धेरै त भागे। हामी चाहिँ बसेकै छौं।'

लकडाउनको समयमा समेत निकै बढी बिरामीको उपचार गर्ने डडेल्धुरा विशेषज्ञ अस्पतालको यो अवस्थाले बिरामीलाई मात्र होइन, चिकित्सकलाई समेत हैरान पारेको छ। नयाँ भवनको पानीसमेत पुरानो भवनको छानामा पर्ने र बाहिर निकास नभएपछि पानी भित्र पस्ने समस्या रहेको अस्पतालका प्रमुख बताउछन्। 'भौतिक संरचनाको अभावमा पुरानो र जीर्ण भवनबाट सेवा संञ्चालन गर्नु परिरहेको छ। संरचना अभावकै कारण समस्या आएको छ,' अस्पतालका निमित्त मेडिकल सुपरिटेन्डेन्ट डा. जगदीशचन्द्र विष्टले भने।

संघीय सरकारले सुदुरपश्चिमको एक मात्र विशेषज्ञ अस्पतालका रूपमा डडेल्धुरा अस्पताललाई विकास गर्ने घोषणा गरेपनि वास्तविकतमा भने वर्षाका समयमा पानी चुहिने समस्या छ। अस्पतालमा कोरोना परीक्षण प्रयोगशालाका लागि संघीय सरकारले अध्ययन गरिएको छ। कोरोना उपचारका लागि संघीय सरकारले ४ जना डाक्टरसमेत पठाएको छ।