काठमाडौं- महिला युरोपियन च्याम्पियनसिप सन् २०२२ को जुलाई ६ देखि ३१ सम्म हुने भएको छ। २०२१ मा हुने तय भएको प्रतियोगिता कोरोना भाइरस (कोभिड १९) का कारण एक वर्ष पछि सरेको हो। २०२१ मा धेरै प्रतियोगिताहरु हुने भएकाले महिला युरोपियन च्याम्पियनसिप एक वर्ष सरेको हो।
पुरुष युरोपियन च्याम्पियनसिप र टोकियो ओलम्पिक २०२१ मा हुने तय भएकाले पनि २०२१ मा अन्य प्रतियोगिता गर्न कठिन देखिएको बताइएको छ। तीन युरोपियन टिमहरु इंग्ल्याण्ड, नेदरल्याण्ड्स र स्वीडेन ओलम्पिकका लागि छानिइसकेका छन्।
कोरोना संक्रमणकै कारण च्याम्पियन्स लिग, युरोपा लिग अनिश्चित हुनुका साथै क्लब विश्वकप जस्ता ठूला प्रतियोगिताहरु पनि सरेका छन्। प्रिमियर लिग, ला लिगा, सिरि ए, लिग वान, बुण्डेसलिगा जस्ता लिगका क्लबहरु आर्थिक संकटमा पनि परिरहेका छन्। रोकिएको सिजन कसरी सकाउने भन्नेमा दुविधा नै छ।
यस्तै युरोपियन फुटबलको प्रशासकीय निकाय युइएफएल आउने अगस्टसम्ममा २०१९–२० सिजनका फुटबल खेलहरु सकाउने तयारी गरिरहेको छ। त्यसका लागि नयाँ मिति र खेल तालिकामा काम गर्नका लागि युइएफएले छुट्टै समूह पनि बनाएको छ। महत्वपूर्ण प्रतियोगिताहरु दुई लेग फम्र्याटमा नै सकाउने युइएफएको योजना छ।
अहिले च्याम्पियन्स लिगसँगै युरोपा लिग फुटबल अर्को सूचना जारी नभएसम्मका लागि स्थगित गर्ने निर्णय भइसकेको अवस्था छ। खेलहरु स्थगित गर्ने निर्णय भएको लामो समय भइसक्दा कोरोना संकटले प्रतियोगिता अनिश्चित बनिरहेको थियो।
अहिले भने २९ अगस्टसम्म बन्द रंगशालामा भए पनि खेल गर्न सकिन्छ कि भन्नेमा युइएफए लागिरहेको छ। त्यसका लागि २३ अप्रिलमा अर्को बैठक हुँदैछ। जसमा इस्तानबुलमा २९ अगस्टमा फाइनल खेल गर्ने गरी अरु खेल अगाडि नै सकाउने योजना बनिरहेको हो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
