काठमाडौं- इंग्लिस प्रिमियर लिगमा खेलाडीहरुलाई ३० प्रतिशत तलब कम लिन गरिएको आग्रहमा खेलाडीहरु छलफल गर्न तयार भएका छन्। तर त्यसका लागि सबै क्लबका लागि उही निर्णयभन्दा क्लबअनुसार फरक फरक नियम हुनुपर्ने बताइएको छ।
कोरोना भाइरस (कोभिड १९) का कारण खेलकुद गतिविधि ठप्प रहँदा युरोपभर क्लबहरुमा आर्थिक संकट देखिएको छ। केही लिगका खेलाडीहरु तलब कम गर्ने विषयमा राजी भइसक्दा पनि प्रिमियर लिगमा भने वहस चलिरहेको छ।
अनिश्चित समयका लागि लिग स्थगित भइसक्दा क्लबहरुमा संकट थपिने देखिन्छ। तलब कम गर्न गरिएको आग्रहमा प्रोफेसनल फुटबलर्स यशोसियसनले त्यसले केही खेलाडीमा जटिल अवस्था सिर्जना हुने बताएको थियो। प्रिमियर लिगका नै केही क्लबले खेलाडीबाहेकका कर्मचारी कटौतीसमेत सुरु गरिसकेको छ।
प्रिमियर लिगमा यो सिजन लिभरपुल उपाधितर्फ अरु क्लबभन्दा दुई पाइला अघि बढिसकेको थियो। लिभरपुलले इतिहासमा सबैभन्दा छिटो उपाधि जितेर कीर्तिमान बनाउने आश गरिरहेका समर्थकहरु कोरोनाको त्रास बढ्दा निराश छन्।
हुन पनि ३० वर्षपछि लिग उपाधि जित्न लागेको लिभरपुल जति निराश यो समय अरु क्लब सायदै होला। प्रिमियर लिगमा लिभरपुल २९ खेलमा ८२ अंकसहित शीर्ष स्थानमा छ। दोस्रोमा रहेको म्यानचेस्टर सिटीको २८ खेलमा ५७ अंक छ।
युरोपियन फुटबलको प्रशासकीय निकाय युइएफएले च्याम्पियन्स लिग र युरोपा लिग फुटबल अर्को सूचना जारी नभएसम्मका लागि स्थगित गर्ने निर्णय गरिसकेको छ। युरोपकै अरु लिगहरुको अवस्था पनि नाजुक बनिरहेको छ। कहिले सुरु गर्न सकिन्छ भन्ने यकिन छैन। जहाँ बेल्जियमले भने लिगको यो सिजन अन्त्य भएको घोषणा नै गरिसकेको छ।
फ्रेन्च लिग वान र स्पेनिस ला लिगा अनिश्चित समयका लागि स्थगित भइसकेको छ। इटालियन सिरी ए मे महिनाको अन्तिममा सुरु गर्ने भनिए पनि त्यो असम्भव जस्तो देखिइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
