काठमाडाैं- राष्ट्रिय मानव अधिकार आयोगले उपचारका लागि आएका बिरामीलाई नफर्काउन अस्पतालहरुलाई आग्रह गरेकाे छ। कतै बिरामीलाई अस्पतालले उपचार नगरेको त कतै स्वास्थ्यकर्मीलाई घरधनीले घरमा बस्न नदिएको भन्ने गुनासाे आएको आयोगले जनाएकाे छ।
आयाेगले आइतबार जारी गरेकाे विज्ञप्तिमा भनिएकाे छ, 'यस जटिल परिस्थितिमा कोभिड- १९ लगायतका सबै गम्भीर प्रकृतिका बिरामीहरूको समेत स्वास्थ्य उपचारको व्यवस्था मिलाइ हरेक व्यक्तिको स्वास्थ्य सम्बन्धी हक सुनिश्चित गर्न आयोग नेपाल सरकार, सम्पूर्ण स्वास्थ्यकर्मीहरू तथा स्वास्थ्य संस्थाहरूलाई विशेष आग्रह गर्दछ।'
कोरोना भाइरस सङ्क्रमणकाे विवरण आइरहँदा कतिपय अस्पतालमा अन्य रोग लागेका वा ज्वरो आएका व्यक्तिहरूलाई अस्पतालको गेटबाट फर्काइएका घटना सार्वजनिक भएका थिए।
मिर्गौला, क्यान्सर, क्षयरोग, एड्स, मधुमेह, उच्च रक्तचाप, मानसिक रोगजस्ता रोगहरूबाट पीडितहरूको उपचार तथा औषधिको अपर्याप्तताको कारण बिरामीहरूमा समस्या उत्पन्न हुन थालेको उजुरी प्राप्त भएको आयोगले जनाएको छ। 'विराटनगरस्थित न्यूरो अस्पताल, विराट नर्सिङ होम, नोवेल अस्पतालमा समयमै उपचार हुन नसकी एक महिलाको मृत्यु हुन गएको, काठमाडौँ उपत्यकास्थित समिट, सिभिल, नर्भिकलगायतका अस्पतालहरूले बहिरङ्ग सेवा बन्द गरी बिरामीलाई फर्काएको, बिरामीहरूले एम्बुलेन्स सेवा प्राप्त गर्न नसकेको तथा कतिपय घरधनीले स्वास्थ्यकर्मीहरूलाई घरमा बस्न नदिएको जस्ता समाचारहरूप्रति पनि आयोगको ध्यान आकृष्ट भएको छ,' आयोगको विज्ञप्तिमा उल्लेख छ।
आयोगले सबै स्वास्थ्यकर्मीहरूको स्वास्थ्य सुरक्षाको सुनिश्चितता, एम्बुलेन्स चालकलगायत सुरक्षाकर्मीहरूलाई आवश्यकता अनुरूप व्यक्तिगत सुरक्षा कवचको उपलब्धता र उनीहरूबाट हुने नियमित सेवा प्रवाहमा आफू विश्वस्त हुन चाहेको बताएको छ। नेपालको संविधान तथा कानुन एवं अन्तर्राष्ट्रिय कानुनबमोजिम प्रत्याभूत गरिएका हरेक व्यक्तिको आकस्मिकलगायत सबै प्रकारका स्वास्थ्य सेवा लिन पाउने अधिकार सुनिश्चित गर्न आयाेगले सरकारलाई आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770103362.jpg)
-1764146706.png)
