काठमाडौं– राष्ट्रिय मानव अधिकार आयोगले नागरिकको स्वास्थ्यप्रति संवेदनशील बन्न र दैनिक उपभोग्य वस्तुकाे आपूर्ति व्यवस्थित गर्न सरकारसँग आग्रह गरेको छ। नेपालको संविधानमा स्वास्थ्यको अधिकारलाई मौलिक हकको रुपमा व्याख्या गरिएको आयाेगले सरकारलाई स्मरण गराएको छ।
आयोगले जटिल परिस्थितिमा नागरिकहरुको स्वास्थ्यप्रति जिम्मेवार हुनु सरकारको प्रमुख दायित्व भएको जानकारी गराएको छ। लकडाउनको लागि सरकारी निर्देशन अवज्ञा गरी घरबाहिर निस्कनेहरुलाई मानवोचित व्यवहार गर्न र कानुन बमोजिम कारवाही गर्न आयोगले आग्रह गरेको छ।
‘लकडाउन’को समयमा घरभित्रै रहन तथा त्यसको अवज्ञा नगर्न आयोगले नागरिकलाई आह्वान गरेको छ। लकडाउनको अवस्थामा घरमै रहेका अपाङ्ग बालबालिका, ज्येष्ठ नागरिक, महिला तथा अतिविपन्नहरुको लागि आवश्यकपर्ने दैनिक उपभोग्य सामग्रीको अभाव हुन नदिन आयाेगले आग्रह गरेकाे छ।
उपचार कार्यमा खटिएका स्वास्थ्यकर्मी, सुरक्षाकर्मी, कर्मचारी र उनीहरुको परिवारको लागि आवश्यक स्वास्थ्य सुरक्षा सुनिश्चितको विशेष व्यवस्था गर्न समेत आयोगले सरकारसँग आग्रह गरेको छ। बिहीबार आयोगले निकालेको विज्ञप्तिमा लकडाउनको सरकारी कदम प्रति सकरात्मक रहेको जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
