काठमाडौं- कोरोनको संक्रमणको जोखिम न्यूनीकरण गर्न स्वास्थ्य सेवा विभागले नयाँ बसपार्क र नागढुंगामा हेल्थ डेस्क राखेको छ। काठमाडौं भित्रने र बाहिरिने यात्रुको ज्वरो जाँच्न उक्त हेल्थ डेस्क स्थापना गरिएको हो।
बसपार्कबाट बाहिरिने यात्रुको तापक्रम परीक्षण गरेर र काठमाडौं बाहिरबाट आउनेको नागढुङ्गामा ज्वरो नाप्ने व्यवस्था स्वास्थ्य विभागले मिलाएको नेपाल यातायात व्यवसायी राष्ट्रिय महासंघका महासचिव सरोज सिटौलाले जानकारी दिए।
कोटेश्वर र बल्खुमा हेल्थ डेस्क राख्नुपर्ने भएपनि ठाउँको अभावले शुक्रबार त्यहाँ राख्न नसकिएको स्वास्थ्य विभागले जनाएको छ। सरकारले व्यवसायीको पहलमा हेल्थ डेस्क राखेको महासचिव सिटौलाले बताए। ‘हामीले धेरै दिनअघिदेखि हेल्थ डेस्क राख्न भनेका थियौं,’ सिटौलाले भने, ‘ढिलै भएपनि राम्रो काम भएको छ। अब यसलाई कोटेश्वर, बल्खुलगायतका आवश्यक स्थानमा विस्तार गर्नुपर्छ।’
यात्रुको चाप धेरै भएको र त्यसअनुसार यातायात सेवा कम भएकोले धेरै समस्या निम्तिने भन्दै सर्वसाधारणलाई नआत्तिकन चाप कम भएपछिमात्रै घर जान व्यवसायीहरुले पनि आग्रह गरेका छन्। बसपार्कबाट महासंघका महासचिव सिटौलाले ज्वरो नापेर यात्रुहरुलाई बस चढाएका थिए। यात्रुलाई ज्वरो देखिए यात्रा नगराई अस्पताल पठाइने समेत उनले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
