काठमाडौं- नेपाल उद्योग परिसंघ र नेपाल धितोपत्र बोर्डले धितोपत्र बजारमा उत्पादनमूलक क्षेत्रको हिस्सा बढाउने तथा बजार सुधार प्रक्रियालाई गति दिन सहकार्य गर्ने प्रतिबद्धता जनाएका छन्। नेपाल धितोपत्र बोर्डका अध्यक्ष भिष्मराज ढुंगाना र नेपाल उद्योग परिसंघका अध्यक्ष सतिशकुमार मोरबीच नेपालमा उत्पादनमूलक तथा सेवा उद्योगको प्रतिनिधित्व गर्ने संगठन भएकाले पूँजी बजारको विकास तथा सुधारका काम गर्दै भन्दै छलफल भएको छ।
अध्यक्ष मोरले बोर्डमा नयाँ नेतृत्व आएपछि पूँजी बजारमा देखिएको सुधारको गतिलाई निजी क्षेत्रले स्वागत गरेको छलफलका क्रममा बताएका थिए। सेयर कारोबारको समय बढाइएको तथा लगानीकर्ताको हित अनुकूलका व्यवस्थाहरु अघि बढाएकोमा पनि अध्यक्ष मोरले निजी क्षेत्र उत्साहित भएको बताए।
यसैगरी परिसंघले नेपाल सरकारका दुई दर्जनभन्दा बढी निकायमा आधिकारिक प्रतिनिधित्व गर्दै नीति निर्माण तथा प्रभावकारी कार्यान्वयनमा सघाउँदै आएको उल्लेख गरे। अध्यक्ष मोरले नेपाल धितोपत्र बोर्डको सञ्चालक समितिमा परिसंघको प्रतिनिधित्वको व्यवस्था गरी थप सहकार्यका लागि समेत आग्रह गरे।
छलफलका क्रममा नेपाल धितोपत्र बोर्डका अध्यक्ष भिष्मराज ढुंगानाले पूँजी बजारको विकास र सुधारका लागि थप पहलहरु लिइरहेको जानकारी गराए। हालै बोर्डले कार्यान्वयनमा ल्याएको विशिष्टिकृत लगानी कोष नियमावलीले स्वदेशी तथा गैर-आवासीय नेपालीलगायत वैदेशिक पूँजी समेत परिचालनलाई सहज बनाएकाले यसमा सहभागिता बढाउन अध्यक्ष ढुंगानाले परिसंघलाई गरे।
धितोपत्र बजार मार्फत पूँजीको सृजना तथा परिचालनलाई महत्व दिएर उत्पादनमूलक र अन्य क्षेत्रको सहभागिता बढाउँदै सेयर बजारलाई थप सन्तुलित बनाउन आवश्यक रहेकोले परिसंघको सहयोग महत्वपूर्ण रहने पनि अध्यक्ष ढुंगनाले उल्लेख गरे। भेटघाट कार्यक्रममा परिसंघका राष्ट्रिय परिषद् सदस्य तथा चितवन उद्योग संघको निवर्तमान अध्यक्ष भेषराज दुवाडी सहित परिसंघ अधिकारीहरुको उपस्थिति थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
