काठमाडौं- च्याम्पियन्स लिग अन्तिम १६ अन्तर्गत मंगलबार राति दुई खेल हुँदैछन्। जसमा इंग्लिस क्लब चेल्सीले जर्मन क्लब बायर्न म्युनिखविरुद्ध साथै स्पेनिस क्लब बार्सिलोनाले इटालियन क्लब नापोलीविरुद्ध खेल्दैछन्।
नापोली र बार्सिलोनाबीचको खेल नापोलीको मैदानमा साथै चेल्सी र बायर्न म्युनिखबीचको खेल चेल्सीको मैदानमा हुनेछ। दुवै खेल नेपाली समयअनुसार राति पौने २ बजे हुने तय छ।
गएको हप्ता च्याम्पियन्स लिग अन्तिम १६ अन्तर्गत नै भएका चार खेलमा एथ्लेटिको मड्रिडले लिभरपुललाई १–० ले हराएको थियो।
बोरुसिया डर्टमुन्डले पिएसजीलाई २–१ ले, एटलान्टाले भ्यालेन्सियालाई ४–१ ले साथै लिपजिगले टोटनह्यामलाई १–० ले हराएका थिए।
यहि हप्ता बुधबार राति लायोनले युभेन्टसविरुद्ध र रियल मड्रिडले म्यानचेस्टर सिटीविरुद्ध अन्तिम १६ को पहिलो लेग अन्तर्गतका खेल खेल्नेछन्।
नापोली भर्सेस बार्सिलोना
युरोपियन प्रतिस्पर्धामा नापोली र बार्सिलोना पहिलोपटक भेटिएका हुन्। यसअघि स्पेनिस क्लब रियल मड्रिडसँग १९८८ मा युरोपियन कप र २०१७ मा च्याम्पियन्स लिगमा भेट हुँदा नापोली पराजित भएको थियो।
च्याम्पियन्स लिग नकआउट चरणमा बार्सिलोनाले इटालियन क्लबविरुद्ध अवे खेल २००६ को अप्रिलमा एसि मिलानलाई १–० ले हराएपछि जितेको छैन। त्यसपछि इटालीमा पाँच खेल खेलिसकेको बार्सिलोनाले १ खेल बराबरी खेलेको छ भने ४ खेल हारेको छ। त्यसमा पनि पछिल्लो चार खेलमा बार्सिलोना गोलविहीन समेत भएको थियो।
नापोली अहिलेसम्म च्याम्पियन्स लिगमा अन्तिम १६ बाट अगाडि बढ्न नसकेको भए पनि बार्सिलोना भने गएको १२ सिजन लगातार अन्तिम १६ बाट माथि उक्लेको छ। बार्सिलोना पछिल्लो पटक अन्तिम १६ बाट बाहिरिएको २००७ मा लिभरपुलसँग पराजित भएर हो।
बार्सिलोनाले च्याम्पियन्स लिग नकआउट चरणमा पछिल्लो आठ अवे खेलमा एक खेल मात्र जितेको छ। ती आठ खेलमा बार्सिलोनाले दुृई गोल मात्र गर्न सकेको छ भने १७ गोल खाएको छ। आठमा दुई बराबरी र पाँच खेलमा हार भोगेको बार्सिलोनाले २०१९ मा म्यानचेस्टर युनाइटेडको मैदानमा युनाइटेडलाई हराएको थियो।
नापोली र बार्सिलोनाबीचको खेल दुवै प्रशिक्षकको पनि पहिलो च्याम्पियन्स लिग खेल हो। नापोली प्रशिक्षक गेनारो ग्याटुसो र बार्सिलोना प्रशिक्षक क्विके सेटियनले यसअघि च्याम्पियन्स लिग खेलमा प्रशिक्षण गरेका थिएनन्।
के भन्छन् प्रशिक्षक?
ग्याटुसो, नापोली– उत्कृष्ट खेलाडीहरु रहेको उत्कृष्ट टिम बार्सिलोनाविरुद्ध खेल्दैछौँ। हामीलाई थाहा छ खेल कठीन हुनेछ तर आफूभन्दा राम्रो टिमविरुद्ध खेल्न पाउनु हामीहरुको लागि खुसीको कुरा हो। हामीमा कुनै डर भने छैन। बार्सिलोनाको खेलको सम्मान गर्दै हामी आफ्नै शैलीको फुटबल खेल्नेछौँ।
सेटियन, बार्सिलोना– मैले खेलाडीहरुलाई जहिले पनि भनिरहेको हुन्छु कि विपक्षी टिमले निकै राम्रो खेल्नेछ भन्ने सोचेर हामी खेलमा जानुपर्ने हुन्छ। हरेक टिमले मैदानमा आफूले सक्ने प्रयास गर्नेछ। यो खेल पनि त्योभन्दा भिन्न हुने छैन। समूह चरणका खेलहरुमा पनि नापोलीले राम्रो गरेको हो।
चेल्सी भर्सेस बायर्न म्युनिख
चेल्सी र बायर्न म्युनिखले यसअघि २०१२ मा च्याम्पियन्स लिग फाइनल खेलेका थिए। जसमा चेल्सी टाइब्रेकरमा ४–३ ले विजयी भएको थियो। चेल्सी र बायर्नबीच यसअघिका चार खेल हेर्दा दुवै टिमले गरेर १७ गोल हानेका छन्।
पछिल्लो १७ सिजनलाई हेर्ने हो भने च्याम्पियन्स लिग नकआउट चरणमा चेल्सी १४ पटक पुगेको छ। त्यसमा २०१४ को सिजनपछि पनि चेल्सी अन्तिम १६ बाट अगाडि बढ्न सकेको छैन।
बायर्न म्युनिख लगातार १२औँ पटक च्याम्पियन्स लिग नकआउट चरणमा पुगेको हो। त्यसमा पछिल्लो आठ सिजनलाई हेर्दा बायर्न सात पटक अन्तिम १६ बाट अगाडि बढेको छ।
जारी सिजन च्याम्पियन्स लिगमा पनि बायर्न म्युनिखको सर्वाधिक १८ अंक थियो। त्यसमा पनि १९ गोल बनाएको थियो। जुन समूह चरणमा बायर्नको सबैभन्दा राम्रो प्रदर्शन हो।
मंगलबार राति बायर्न म्युनिखविरुद्धको खेलमा चेल्सीका महत्वपूर्ण मिडफिल्डर एन्जेलो कान्टे हुने छैनन्। घाइते रहेका उनी कम्तिमा तीन हप्ता मैदानबाहिर रहने बताइएको छ। क्रिष्टियन पुलिसिक, पेड्रो र क्यालम हडसन पनि नखेल्ने सम्भावना रहेको छ। यस्तै बायर्नका मिडफिल्डर निकालस सुले र फरवार्ड इभान पेरेसिक पनि घाइते रहेकाले मैदान बाहिर हुनेछन्।
के भन्छन् प्रशिक्षक?
फ्रान्क लामपार्ड, चेल्सी– खेलाडीहरुले पूरा ध्यान लगाएर खेल्नुपर्ने हुन्छ। हामीले पाएको मौकामा गोलमा बढेर आक्रामण गर्ने रणनीति अपनाए पनि डिफेन्सिभ माइनसेट भने बनाइराख्नु पर्छ। समर्थकहरुले चेल्सीलाई यसपटक अन्डर डगका रुपमा पनि हेर्नेछन् किनभने बायर्न निकै बलियो टिम हो। उनीहरुको जति अनुभव हामीसँग छैन तर पनि नतिजा आफ्नो पक्षमा पार्न सक्छौँ।
हान्सी फिल्क, बायर्न म्युनिख– युवा खेलाडीहरु रहेको चेल्सी राम्रो टिम हो। उनीहरु निर्धक्क खेल्नेछन् जुन उनीहरुको बलियो पक्ष हुनेछ। विशेष गरेर अट्याकमा बढ्दा नै उनीहरु डरविहीन लाग्छन् र तीब्र पनि छन्। डिफेन्सिभ कमजोरी देखिएको छ तर पनि टिमका रुपमा चेल्सीले राम्रो चुनौती दिनेछ। हामी विश्वस्त भएर अट्याकमा बढ्नुपर्ने हुन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
.jpg)
-1763721444.png)
