काठमाडौं- एभरेस्ट प्रिमियर लिग (इपिएल) टी ट्वान्टी प्रतियोगितामा गएको वर्षको विजेता टिम ललितपुर प्याट्रियोट्सले तीन विदेशी खेलाडी अनुबन्ध गरेको छ।
यसअघि श्रीलंकन खेलाडी उपुल थारङ्गा ल्याइसकेको ललितपुरले अहिले अलराउण्डर हम्माद आजम र हसन खान साथै बलर मिर हाज्मालाई ल्याएको हो। तीनै खेलाडी पाकिस्तानका हुन्।
हाज्मासँग इंग्ल्याण्डमा काउन्टी क्रिकेट खेलेको अनुभव रहेको छ। यस्तै हसनले पाकिस्तान सुपर लिग र क्यानडाको ग्लोबल टी२० लिग खेलिसकेका छन्। उनी यु१९ क्रिकेट विश्वकपमा पाकिस्तानी टिमका कप्तानसमेत रहिसकेका छन्। यस्तै पाकिस्तान कप क्रिकेटमा उत्कृष्ट ब्याट्सम्यान बनेका हम्माद पनि राम्रा ब्याट्सम्यानमा गनिन्छन्।
आउँदो चैत १ गतेदेखि १५ गतेसम्म सञ्चालन हुने इपिएल टी ट्वान्टी क्रिकेटका लागि ललितपुर टिमको कप्तानमा राष्ट्रिय टिमका समेत कप्तान ज्ञानेन्द्र मल्ल रहेका छन्। यस्तै प्रशिक्षकमा राजु बस्नेत छन्।
‘हाम्रै खेलाडीहरुले पनि राम्रो प्रदर्शन गरिरहेका बेला थप तीन विदेशी खेलाडी ल्याएपछि टिम थप सन्तुलित बनेको छ। यो पटक पनि उपाधि दाबेदार टिमका रुपमा ललितपुर रहने छ’ प्रशिक्षक बस्नेतले भनेका छन्।
यसअघि ललितपुर प्याट्रियोट्सले श्रीलंकन खेलाडी उपुल थारङ्गा र भैरहवा ग्लाडियटर्सले ड्वायन स्मिथ जस्ता अन्तर्राष्ट्रिय ख्यातीप्राप्त खेलाडीसमेत ल्याइसकेको छ। यस्तै चितवन टाइगर्स टिमले अफगानिस्तानका विकेटकिपर ब्याट्सम्यान मोहम्मद साहजादलाई अनुबन्ध गरेको छ। पोखरा राइनोजले क्रिस गेलसँगै क्रेसिक विलियम्सलाई अनुबन्ध गरिसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
