काठमाडौं- च्याम्पियन्स लिग अन्तिम १६ को खेलमा पहिलो लेग अन्तर्गत मंगलबार राति पौने दुई बजे दुई खेल हुँदैछन्। जसमा स्पेनिस क्लब एथ्लेटिको मड्रिड र लिभरपुल साथै जर्मन क्लब बोरुसिया डर्टमुन्ड र फ्रेन्च क्लब पेरिस सेन्ट जर्मेन (पिएसजी) खेल्दैछन्।
लिभरपुल र एथ्लेटिको मड्रिडबीचको खेल एथ्लेटिको मैदानमा हुनेछ। विगत हेर्दा चार खेलमा दुवै टिमले एक–एक खेल जितेका छन् भने दुई खेल बराबरी भएको छ। तर अहिलेको अवस्थामा प्रिमियर लिगमा अपराजित लिभरपुल अझ बलियो देखिएको छ।
यसैले गएको वर्षको च्याम्पियन्स लिग विजेता लिभरपुललाई रोक्न सहज नभएको एथ्लेटिको प्रशिक्षक डिएगो सिमोन बताउँछन्।
‘हामीले निकै राम्रो टिमविरुद्ध खेल्दै छौँ, लिभरपुल यस्तो प्रशिक्षणमा छ जहाँ अरु टिममा भन्दा निकै भिन्नता देखिन्छ। इतिहासमा लिभरपुलको यो टिम उत्कृष्ट टिमका रुपमा रहनेछ’ प्रशिक्षक सिमोनले भनेका छन्।
सिमोनले लिभरपुलको तारिफ गरेजस्तै लिभरपुल प्रशिक्षक योर्गेन क्लोप पनि एथ्लेटिको मड्रिडको तारिफ गर्छन्। ‘एथ्लेटिको मिलेको टिम हो। उनीहरु अहिले फेरिँदो अवस्थामा छन्, त्यो सामान्य हो। तर उनीहरु आफूसँग जे जस्तो छ त्यसले निकै कडा चुनौती प्रस्तुत गर्नेछन्’ क्लोपले भनेका छन्।
एथ्लेटिकोमा घाइते रहेका कोस्टा टिममा फर्किए पनि उनी खेल्ने नखेल्ने यकिन छैन। फेलिक्स भने घाइते रहेकै कारण टिमबाट बाहिर छन्। लिभरपुलमा घाइते रहेकाले साकिरी टिमबाट बाहिर छन्।
बोरुसिया डर्टमुन्ड भर्सेस पिएसजी
पिएसजीका स्ट्राइकर नेमार चोटबाट फर्किएकाले बोरुसिया डर्टमुन्डविरुद्धको खेलमा उपस्थित हुने अनुमान गरिएको छ। त्यसले डर्टमुन्डलाई थप चुनौती हुने फुटबल पण्डित बताउँछन्। चोटका कारण नेमारले चार खेल गुमाएका थिए।
पिएसजीका प्रशिक्षक थोमस टचेल यसअघि बोरुसियामा रहेकाले उनले विपक्षी टिम राम्ररी बुझेको बताइएको छ। यसअघि लगातार तीन च्याम्पियन्स लिगमा अन्तिम १६ बाट नै बाहिरिएकाले पिएसजी विशेष चनाखो पनि देखिन्छ।
यसअघि २०१०–११ को युरोपा लिग समूह चरणमा दुवै क्लबबीच भेट हुँदा दुवै लेग बराबरीमा सकिएको थियो। पहिलो लेग डर्टमुन्डमा १–१ को बराबरीमा सकिएको थियो भने दोस्रो पेरिसमा गोलरहित बराबरीमा सकिएको थियो।
२०२० लागेपछि डर्टमुन्डले बुन्डेसलिगाका पाँच खेलमा २३ गोल गरिसकेको छ। यसले डर्टमुन्ड उच्च लयमा देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1789383080.png)
