काठमाडौं- सहिद स्मारक ए डिभिजन लिग विजेता मछिन्द्र क्लबलाई एसियन फुटबल महासंघ (एएफसी) ले बधाई दिएको छ।
एएफसीका महासचिव विन्ड्सर जोनले अखिल नेपाल फुटबल संघ (एन्फा) का महासचिव इन्द्रमान तुलाधरलाई पत्र पठाउँदै मछिन्द्र क्लबलाई बधाई दिएको हो। पत्रमा २०१९–०२० को संस्करणको ए डिभिजन लिग विजेता मछिन्द्र क्लबलाई बधाई दिदै २०२१ मा हुने एएफसी क्लब प्रतियोगितामा स्वागत गरेको छ।
तर एएफसी प्रतियोगिताका लागि अनिवार्य रुपमा क्लब लाइसेन्स लिएको हुनुपर्ने उल्लेख गरेको छ। अहिलेसम्म नेपालका कुनै पनि क्लबले एएफसीका क्लब लाइसेन्स लिएको छैन। त्यस्तै, एन्फालाई ए डिभिजन लिग राम्रोसँग सम्पन्न गरेको भन्दै बधाई दिएको छ। एन्फाको यो सफलताले एसियामा फुटबलको विकास पुग्ने पनि उल्लेख गरेको छ।
फागुन ३ गते सम्पन्न भएको लिगको अन्तिम खेलमा मछिन्द्रले आर्मीलाई १–० गोलले पराजित गर्दै पहिलो पटक लिगको उपाधि जितेको थियो। १३ खेलबाट ३१ अंक बनाएको मछिन्द्रले १० खेलमा जित, २ खेलमा बराबरी र १ खेलमा हार ब्यहोरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
