काठमाडाैं- कवि तथा पत्रकार मणि लोहनीको नयाँ कविता संग्रह 'मृत्युको अघिल्तिर' प्रकाशित भएको छ। मानवीय सम्बन्ध र जीवन दर्शनलाई पहिल्याउने मणि पछिल्लो समय मृत्युपछिको महाशुन्यता र रहस्यमाथि कथा कविता लेखिरहेका छन्। शिखा बुक्सले बजारमा ल्याएको कवितासंग्रहमा तीन खण्ड गरि फरक-फरक विषयका ३२ कविता संकलित छन्।
'१५ वर्षपछि कविता संग्रह आएको छ निकै उत्साहित भएको छु,' मणिले भनेका छन्, 'प्रकाशकसँग सल्लाह गरि चाँडै विमोचनको मिति तय गरिने छ।' टेलिभिजन पत्रकारितामा सक्रिय मणिको पहिलो कविता संग्रह 'आन्दोलनले छट्पटाएका कलमहरु' २०४९ सालमा प्रकाशित भएको हो। त्यसयता उनी कथा, निवन्ध र कविताको क्षेत्रमा सक्रिय छन्। उनका कथा र कविताका गरी पाँच कृति प्रकाशित छन्।
वि.स. २०६१ सालमा प्रकाशित 'मलामी साँझ' कविता संग्रहसँगै नेपाली कवितामा जबर्जस्त उपस्थिति देखाएका उनका 'परास्त प्रेम' र 'निर्वस्त्र मन' चर्चित कथा संग्रह हुन्। भानुमोति पुरस्कार २०५८, सर्वोकृत्ष्ट कथा पुरस्कार २०६३, युवावर्ष मोति पुरस्कार २०६८, शतिसचन्द्र रेग्मी अतुल स्मृति पुरस्कार २०६९, ससिद्धि राष्ट्रिय कलाश्री युवा पुरस्कार २०७४, बनिताश्री काव्य पुरस्कार २०७५ र संसाक कथा पुरस्कार २०७६ बाट सम्मानित मणिका केही कविता र कथा हिन्दी, अङ्ग्रेजी, बङ्गाली, जापानिज र कोरियन भाषामा प्रकाशित भएका छन्।
'मृत्युको अघिल्तिर' ले पाठकहरुको कविताको भोकलाई केही शान्त पार्ने विश्वास लिएको शिखा बुक्सका अध्यक्ष पुष्पराज पौडेलले बताए । कृतिको मूल्य दुई सय रुपैयाँ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
