सरस्वतीको पोष्टमा संकटाको ६ गोल

नेपाल लाइभ | २०७६ फागुन १ बिहीबार | Thursday, February 13, 2020 १९:०९:०० मा प्रकाशित

काठमाडौं- सहिद स्मारक ए डिभिजन लिग फुटबलमा संकटाले आफ्नो अन्तिम खेलमा रेलिगेसनमा परेको सरस्वती युथ क्लबमाथि फराकिलो जित हात पारेको छ।

सातदोबाटोस्थित एन्फा कम्प्लेक्समा बिहीबार भएको खेलमा संकटा क्लबले सरस्वतीलाई ६–२ गोलअन्तरले पराजित गरेको हो। संकटालाई जिताउन मेसउके ओलुउमउले दुई गोल गर्दा सुवास गुरुङ, टिकाराज गुरुङ र रोशन पहाडीले समान १–१ गोल गरे। एक गोल भने संकटाले उपाहार स्वरुप पाएको थियो। यता, सरस्वतीका लागि भने कजिम बुसारीले दुई गोल गरे।

पहिलो हाफमा तीन गोलले पछि परेको सरस्वतीले दोस्रो हाफमा थप तीन गोल खाँदा दुई गोल मात्रै फर्काउन सफल भयो।

खेलको पाँचौं मिनेटमा नै मेसउकेले गोल गर्दै संकटालाई अग्रता दिलाएका थिए। खेलको ३३औं मिनेटमा उनले नै गोल गर्दै संकटालाई २–० गोलको अग्रता दिलाउँदा ३७औं मिनेटमा सुवासले गोल गर्दै पहिलो हाफसम्म ३–० गोलको अग्रतामा पुर्याए।

खेलको ५६औं मिनेटमा टिकाराजले गोल गर्दै संकटाको अग्रतालाई ४–० गोलमा पुर्याए। तर खेलको ६५औं मिनेटमा सरस्वतीका पुर्णबहादुरले आफ्नै पोष्टमा आत्मघाती गोल गरेसँगै संकटाले ५–० को अग्रता लियो।

खेलको ६६औं र ७९औं मिनेटमा बुसारीले गोल गर्दै सरस्वतीलाई ५–२ गोलको स्थितिमा पुर्याउँदै खेलमा फर्काउने प्रयास गरेका थिए। तर ८३औं मिनेटमा रोशनले गोल गरेसँगै सरस्वतीमाथि संकटाले ६–२ गोलको फराकिलो जित निकालेको हो।

जितसँगै संकटा क्लबले १३ खेल खेल्दै ५ खेलमा जित, ३ खेलमा बराबरी र ५ खेलमा हार ब्यहोर्दै १८ अंकमा लिग सकाएको छ। सरस्वती क्लब भने यो खेल अघि नै रेलिगेसनमा परेको थियो। सरस्वतीले खेलको १३ खेलमध्ये १ खेलमा मात्रै जित, १ खेलमा बराबरी र ११ खेलमा हार ब्यहोर्दै ४ अंक बटुलेर लिग सकाएको छ।

लिगको उपाधिको दौढमा विभागीय क्लब आर्मी र मछ्रिन्द्र क्लब छन्। यी दुई टिमबीचको अन्तिम खेलले लिग विजेताको टुंगो लाग्ने छ।