काठमाडौं- आइसिसी विश्व कप क्रिकेट लिग टु अन्तर्गत नेपाल र ओमानसँगको त्रिदेशीय सिरिजको चार खेलमा हार व्यहोरेको अमेरिकी टिमका प्रशिक्षक जेम्स पाम्मेन्टले नेपालको अवस्थाअनुसार आफूहरुको तयारी हुन नसकेको बताएका छन्।
अमेरिका सिरिजको पहिलो खेलमा ओमानसँग ६ विकेटले, दोस्रो खेलमा नेपालसँग ३५ रनले, तेस्रो खेलमा ओमानसँग ९२ रनले र अन्तिम खेलमा नेपालसँग ८ विकेटले हारेको हो। अन्तिम खेलमा ३५ रनमा नै अलआउट हुनु लज्जास्पद भएको प्रशिक्षक जेम्सको भनाइ छ।
‘हाम्रो तयारी जस्तो हुनुपर्ने हो त्यस्तो हुन सकेको थिएन। मैदानबाहिरका केही प्रेसरहरु पनि कसरी ब्यवस्थापन गर्ने भन्ने भएन। खेलाडीले आफूमा भएको राम्रो ज्ञान खेलमा प्रस्तुत गर्न केही कमी भयो’ उनले भने।
नेपालको मैदानको अवस्थाबारे प्रशिक्षक जेम्स भन्छन्- ‘ कीर्तिपुर मैदान खराब भनेर त भन्दिन तर अवस्था भिन्न भने हो। त्यसो त हरेक ठाउँमा मैदानको अवस्थाहरु भिन्न भइनै हाल्छ। यहाँको अवस्था बुझेर त्यसअनुसार खेल्न नसक्नु नै हाम्रो कमजोरी हो। हामीले फ्लोरिडामा खेल्दा र युएईमा खेल्दाको भन्दा यहाँ भिन्न त भइनै हाल्छ।’
नेपाल र ओमानसँगको सिरिजअघि अमेरिकाले लिग टु मा खेलेका ८ खेलमा ६ खेल जितेको थियो। जसले १२ अंकसहित शीर्ष स्थानमा रहेको अमेरिका कीर्तिपुर मैदानमा चारै खेल हारेर दोस्रो स्थानमा झरेको छ। अहिले १० खेलमा ८ खेल जित्दै लिग टु को तालिकामा ओमान शीर्ष स्थानमा छ। ४ खेलमा २ खेल जितेको नेपालको ४ अंक छ।
अमेरिकी टिमका कप्तान सौरभ नेत्रावल्करले नेपालको बलिङ निकै राम्रो भएकाले अन्तिम खेलमा आफूहरु कमजोर देखिएको बताए।
.JPG)
कप्तान र प्रशिक्षकले खेलपछि के भने?
‘नेपालको बलिङ राम्रो रह्यो’ – सौरभ नेत्रावल्कर (अमेरिकी टिम कप्तान)
हामीले हाम्रो स्तरको खेल खेल्नै सकेनौँ। हारमा कारण यही हो भन्दा पनि केही मिश्रित कारणहरु छन्। यहाँको विकेटको अवस्थाअनुसार हामीले टस जितेको भए पनि पहिले बलिङ नै गर्ने थियौँ। नेपालले राम्रो बलिङ गरेको हो। उनीहरुको बल लाइन र लेन्थमा मात्रै थियो। नेपालको राम्रो खेलको तारिफ गर्नै पर्छ।
हामी जहिले मैदानमा हुन्छौँ सधैँ शतप्रतिशत खेल्ने सोचमा नै हुन्छौँ। आज लक्ष्य कम भए पनि नेपालको दुई विकेट लिन सक्यौँ। हामीले प्रयास गरेको हो तर ब्याटिङ नै नचल्दा बलिङमार्फत धेरै गर्न पनि सकिँदैन।
हामीले यसअघिको तीन खेल हारे पनि प्रतिस्पर्धामा पुगेका थियौँ तर आज त त्यस्तो हुन सकेन। अब अगाडिको खेलका लागि यो सिरिजले सिक्ने मौका भने मिलेको छ। हामीले स्किल र टेक्निकल कुरा मात्रै होइन अरु कुरामा पनि विचार गर्नुपर्ने भएको छ।
.JPG)
‘लज्जास्पद हार भयो’ – जेम्स पाम्मेन्ट (अमेरिकी टिम प्रशिक्षक)
हाम्रो तयारी जस्तो हुनुपर्ने हो त्यस्तो हुन सकेको थिएन। मैदानबाहिरका केही प्रेसरहरु पनि कसरी ब्यवस्थापन गर्ने भन्ने भएन। खेलाडीले आफूमा भएको राम्रो ज्ञान खेलमा प्रस्तुत गर्न केही कमी भयो।
खेलाडीहरुको सम्झौता के कस्तो छ भन्ने मलाई थाहा छैन। उनीहरुले नियमति क्रिकेट खेल्न पाइरहेका छन् कि छैनन् भन्नेमा विचार गर्नुपर्छ। हरेक सिरिजका लागि तयारी नै राम्रो हुनुपर्छ। यो सिरिजमा पनि हामी १० दिनअघि मात्रै जम्मा भएका थियौँ। त्यसले आवश्यक सबै कामहरु गर्न सकिँदैन। यहाँको कन्डिसन बुझ्ने समयसमेत पर्याप्त भएन। त्यसैले हाम्रो लज्जास्पद हार भयो।
हामीले लिग २ मा सुरुका खेलहरुमा राम्रो गरे पनि पछिल्लो केही खेलहरु राम्रो हुन सकेन। यी खेलाडीहरु खेलमा राम्रो योजना बनाएर लागे भने राम्रो खेल देखिन्छ भन्ने लाग्छ। प्रतिस्पर्धामा बढेको खेल देखाउन सक्ने टिम नै हो। अब अगाडि राम्रो होला भन्ने सोचौँ।
कीर्तिपुर मैदान खराब भनेर त भन्दिन तर अवस्था भिन्न भने हो। त्यसो त हरेक ठाउँमा मैदानको अवस्थाहरु भिन्न भइनै हाल्छ। यहाँको अवस्था बुझेर त्यसअनुसार खेल्न नसक्नु नै हाम्रो कमजोरी हो। हामीले फ्लोरिडामा खेल्दा र युएईमा खेल्दाको भन्दा यहाँ भिन्न त भइनै हाल्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
