काठमाडौं- आइसिसी विश्व कप क्रिकेट लिग टु अन्तर्गत त्रिदेशीय सिरिजको अन्तिम खेलमा अमेरिकालाई ३५ रनमा नै अलआउट गर्दा नेपाली लेग स्पिनर सन्दीप लामिछानेले ६ विकेट लिए।
६ ओभरमा १६ रन खर्चेर ६ विकेट लिनु एकदिवसीय क्रिकेटमा राम्रो बलिङ आँकडा हो। ३६ रनको लक्ष्य पछ्याएको नेपालले अमेरिकालाई ८ विकेटले हरायो। तर पनि सिरिजमा ओमनविरुद्धको खेलमा विकेट लिन नसकेको भन्दै सन्दीपको आलोचना भने भयो नै।
अमेरिकासँगकै पहिलो खेलमा सन्दीपले दुई विकेट लिएका थिए। ओमनसँग भने पहिलो खेल १८ रनले र दोस्रो खेल ८ विकेटले हार्दा सन्दीप विकेटविहीन थिए।
सिरिजअघि नै आफ्नो एक विकेट बराबर चितवनमा धुर्मुस सुन्तली फाउन्डेसनले बनाइरहेको क्रिकेट रंगशालाका लागि ८ हजार ८ सय ४८ रुपैयाँ दिने घोषणा गरेका उनको ओमानसँगको खेलमा विकेटविहीन हुँदा आलोचना निकै बढेको थियो।
त्यसमा सन्दीप क्रिकेट खेल नै त्यस्तै भएको र खेलाडीले हरेक अवस्थामा आलोचनाको सामना गर्नुपर्ने बताउँछन्।
‘क्रिकेट भनेको नै यस्तै हो। हामीले अहिलेसम्म नौ एकदिवसीय खेल त खेलेका छौँ। त्यसले हरेक दिन केही सुधारहरु त हुँदै गएको छ। मैले ओमानविरुद्धको खेलमा विकेट लिन सकिनँ। तर त्यसमा पनि बलिङ नराम्रो गरेर भन्ने चाहिँ होइन। विकेटकै लागि बढेर बलिङ गरिरहेको थिएँ। त्यसमा ओमानका ब्याट्सम्यानले मेरो बलिङ राम्ररी बुझेर खेले जस्तो लाग्छ’ उनले भने।
.JPG)
राम्रो गर्दा र नराम्रो गर्दा दर्शकबाट आउने हरेक कुरालाई आफूले सकरात्मक भएर हेर्ने उनको भनाइ छ। अमेरिकाविरुद्धको खेलमा व्यक्तिगत उच्च बलिङ प्रदर्शन गरेका सन्दीप आफ्नो खेलमा खुसी रहेको बताउँछन्।
‘आजको खेलमा ६ ओभरमा ६ विकेट लिन सक्दा निकै खुसी लागेको छ। यो आँकडालाई हेर्दा पनि एकदिवसीय क्रिकेटका लागि राम्रो बलिङ प्रदर्शन हो। टिमको जित नै विशेष महत्व राख्छ र मेरो खेलले टिमलाई जिताउन पाउँदा खुसी त लागि नै हाल्छ’ उनले भने।
पूरा सिरिजलाई हेर्दा आफ्नो भन्दा पनि सुशन भारीको बलिङ तारिफयोग्य रहेको सन्दीपले बताए। सुशनले सिरिजको ४ खेलमा ११ विकेट लिएका थिए। उनले अमेरिकाविरुद्धको अन्तिम खेलमा पनि ४ विकेट लिए।
‘सुशनले निकै राम्रो गरेको हो। आजको खेलमा मात्रै होइन उसले यो सिरिजभर नै राम्रो बलिङ गरेको छ। अनुभव लिँदै जाँदा उसको अगाडिको खेल अझ राम्रो हुनेछ भन्ने लाग्छ’ सुशनको तारिफमा सन्दीपले भने।
सुशन भारी
सन्दीपको भनाइ उनकै शब्दमा...
क्रिकेट भनेको नै यस्तै हो। हामीले अहिलेसम्म नौ एकदिवसीय खेल त खेलेका छौँ। त्यसले हरेक दिन केही सुधारहरु त हुँदै गएको छ। मैले ओमानविरुद्धको खेलमा विकेट लिन सकिनँ। तर त्यसमा पनि बलिङ नराम्रो गरेर भन्ने चाहिँ होइन। विकेटकै लागि बढेर बलिङ गरिरहेको थिएँ। त्यसमा ओमानका ब्याट्सम्यानले मेरो बलिङ राम्ररी बुझेर खेले जस्तो लाग्छ।
टी२० खेल्नेवित्तिकै एकदिवसीयमा १० मा १० नै विकेट लिन सकिन्छ भन्ने होइन। खेलाडीको जीवनमा आलोचना त सधैँ रहिनै हाल्छ। राम्रो गर्दा पनि नराम्रो गर्दा पनि हामीले केही न केही त सुनिरहेका हुन्छौँ। आलोचनालाई पनि सकारात्मक रुपमा लिएर अगाडि बढ्ने मेरो बानी छ।
अमेरिकासँगको आजको खेलमा मैले भन्दा पनि सुशन भारीले निकै राम्रो गरेको हो जस्तो लाग्छ। कप्तान ज्ञानेन्द्र मल्ल दाइसँग आज पनि स्पिन अट्याकमा नै बढ्ने भन्ने कुरा पहिले नै भएको थियो। त्यसमा सुशनले निकै राम्रो गरेको हो। आजको खेलमा मात्रै होइन उसले यो सिरिजभर नै राम्रो बलिङ गरेको छ। अनुभव लिँदै जाँदा उसको अगाडिको खेल अझ राम्रो हुनेछ भन्ने लाग्छ।
आजको खेलमा ६ ओभरमा ६ विकेट लिन सक्दा निकै खुसी लागेको छ। यो आँकडालाई हेर्दा पनि एकदिवसीय क्रिकेटका लागि राम्रो बलिङ प्रदर्शन हो। टिमको जित नै विशेष महत्व राख्छ र मेरो खेलले टिमलाई जिताउन पाउँदा खुसी त लागि नै हाल्छ।
गएको दुई वर्षदेखि नयाँ बलमा स्पिन बलिङ गर्ने गरिरहेको छु। त्यसले पनि नयाँ बलमा कसरी बल फाल्नुपर्छ भन्ने ज्ञान मिलेको छ। त्यसमा कप्तानले विश्वास देखाएर समयमा बलिङ दिँदा राम्रो भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782224905-1782225890.jpeg)
-1764146706.png)
