काठमाडौं- आइसिसी विश्वकप क्रिकेट लिग–टु अन्तर्गत त्रिदेशीय सिरिजमा नेपालले अमेरिकालाई पराजित गरेको छ।
१९१ रनको चुनौती पछ्याउँदै ब्याटिङ गरेको अमेरिकाले ४४.१ ओभरमा सबै विकेटको क्षतिमा १५५ रन मात्रै बनाएपछि नेपालले ३५ रनले पराजित गरेको हो।
सुरुवातमै दबाबमा आएको अमेरिकाले १०.१ ओभरमा २७ रन बनाउँदा सुरुवाती पाँच विकेट गुमाएको थियो। अमेरिकाको अग्रपंक्तिका ब्याट्सम्यानलाई सस्तैमा समेट्ने क्रममा नेपालका सुशन भारी, सन्दीप लामिछाने र करण केसीले उत्कृष्ट बलिङ गरे।
एकपछि अर्को विकेट गुमाइरहे पनि अमेरिकाका इयन होल्यान्डले भने टिकेर रन बटुली रहे। उनले ७५ रन बनाए। ४०.४ ओभरमा उनलाई करणले आउट गरेपछि नेपालको जित सम्भव भएको हो। त्यस्तै, अमेरिकाका क्यामरन स्टेभनसनले १९ र करिमा गोर र रुस्टी थोरनले समान १०–१० रन बनाउन बाहेक अन्य खेलाडीले दोहोरो अंक नै बटुल्न सकेनन्।
.jpg)
बलिङतर्फ नेपालका करण केसीले ४ विकेट लिए। उनले ७.१ ओभर बलिङ गर्दै १ ओभर मेडन राखेर १५ रन मात्रै खर्चिदै ४ विकेट लिएका हुन्। सुशन भारीले ३ विकेट लिए। उनले १० ओभर बलिङ गर्दै १ ओभर मेडन राखेर ४३ रन खर्चिएका थिए। त्यस्तै, सन्दीप लामिछानेले २ विकेट लिए। उनले १० ओभरमा २ ओभर मेडन राख्दै २७ रन मात्र खर्चिए। त्यस्तै, एक विकेट भने कुशल मल्लको नाममा रह्यो।
कुशलको विश्व रेकर्ड
त्रिवि क्रिकेट मैदानमा टस हारेर पहिले ब्याटिङ गरेको नेपालले खराब सुरुवात गर्दै ४९.२ ओभरमा सबै विकेटको क्षतिमा १९० रन बनाएपछि अमेरिकाले सामान्य लक्ष्य पाएको थियो।
छैटौं नम्बरमा ब्याटिङ गर्न आएका कुशल मल्ल र सातौं नम्बरमा आएका विनोद भण्डारीले उकासे नेपाली पारी सम्हाले। कुशल र विनोदले ८४ रनको साँझेदारी गर्दै नेपाललाई उकासेका थिए। कुशल छैटौं विकेटको रुपमा ५० रन बनाएर आउट हुँदा नेपालको स्कोर १३३ पुगेको थियो। कुशलले ५१ बलमा ४ चौका र ३ छक्का प्रहार गरे।
कुशलले अर्धशतक मात्रै बनाएनन् आफ्नो डेब्यु एकदिवसीय अन्तर्राष्ट्रिय क्रिकेट खेलमा विश्व रेकर्ड पनि राखे। १५ वर्ष ३४० दिन पुगेका कुशलले सबैभन्दा कम उमेरमा अर्धशतक बनाएर विश्व रेकर्ड राखेका हुन्। यसअघि यो रेकर्ड नेपालकै रोहितकुमार पौडेलका नाममा थियो। रोहितले १६ वर्ष १४६ दिनको हुँदा युएईविरुद्ध दोस्रो एकदिवसीय खेलमा अर्धशतक बनाउँदै विश्व रेकर्ड राखेका थिए।
.jpg)
खराब सुरुवात गरेको नेपालका लागि ३.१ ओभरमा ६ रन हुँदा सुवास खकुरेल व्यक्तिगत ३ रन बनाएर आउट भए। ४६ रन हुँदा दोस्रो विकेटको रुपमा कप्तान ज्ञानेन्द्र मल्ल २१ रनमा आउट भएपछि नेपालको एकपछि अर्को विकेट पतन सुरु भएको थियो।
४७ रन हुँदा दीपेन्द्रसिंह ऐरी शुन्य रनमा आउट भए। ४७ रन मै पारस खड्का चौथो विकेटको रुपमा १९ रन बनाएर आउट भएपछि नेपाल पूर्णरुपमा दबाबमा आएको थियो। त्यस लगतै ४९ रन हुँदा आरिफ शेख पनि २ रनमा आउट भए।
त्यसपछि आएका कुशल र विनोदले सम्हालिएर खेल्दै नेपालको पारी उकासे। विनोदले पनि अर्धशतक बनाए। उनले ७९ बलमा ६ चौका र १ छक्का प्रहार गर्दै ५९ रन बनाए। बलिङतर्फ अमेरिकाका क्यामरन स्टेभनसनले ३ विकेट लिए।
अब नेपालले आइतबार ओमानविरुद्ध प्रतिस्पर्धा गर्नेछ।
.jpg)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790071578.png)
-1786602170.png)
-1789631269.jpg)
