काठमाडौं- गायिका आस्था राउतले आफूलाई महिला प्रहरीले दुर्व्यहार गरेको भन्दै बिहीबार एउटा लाइभ भिडियो सार्वजनिक गरिन्।
भिडियोमा आफूलाई दुर्व्यवहार गरेको भन्दै प्रहरीलाई अपाच्य हुने शब्दमार्फत् गाली गलौजमा उत्रिइन्। एउटा कलाकारले अपाच्य शब्दबाट गाली गलौज गर्नु नहुने भन्दै उनको सर्वत्र आलोचना भयो।
भाइरल बनेको त्यो भिडियोले प्रहरीको समेत ध्यान केन्द्रित गर्यो। आस्थाले यसरी प्रहरीको चरित्रमाथि नै दाग लगाएको भन्दै यसमाथि प्रहरीले अनुसन्धान थालेका थिए।
अनुसन्धानको क्रममा एयरपोर्टमा भएको घटना के थियो भन्ने विषयमा खोज्दै जाँदा सिसिटिभी फुटेज सार्वजनिक भयो।
के थियो सिसिटिभी फुटेजमा
सार्वजनिक भएको फुटेज हेर्दा आस्थाले भनेजस्तो देखिएन। न त्यहाँ उनलाई महिला प्रहरीले बल प्रयोग गरेकी छिन्, न कुनै त्यस्तो दुर्व्यवहार नै।
भिडियो हेर्दा आस्था सरासर आएकी देखिन्छन्। उनले एक्स–रे मा झोला राखिन्। उनको हातमा कफी थियो। उनी हातमा कफी बोकेर गेटबाट भित्र पस्न खोज्छिन्।।
महिला प्रहरीले तिनलाई रोक्न खोज्छिन्। ती प्रहरीले उनको हातबाट कफी लिएर साइडमा राखिदिन्छिन्। बाक्लो ज्याकेट लगाएकी आस्थालाई प्रहरीले ज्याकेट खोल्न अनुरोध गरेको देखिन्छ। उनी ज्योकट खोलेर पुनः भित्र आउँछिन्। प्रहरीले जाँच गरेपछि आस्था जान खोज्छिन्।
चेकजाँचपछि आस्थाले बोकेर आएको कफी ती महिला प्रहरीले उनैलाई थमाउन खोज्छिन्। तर, आस्था मान्दिनन्। उल्टै रिसाएर कफी टेबलमा राखिदिन्छिन्। त्यही बेलामा दुई जनाबीच भनाभन भएको देखिन्छ। आस्थाले कफी झोंकिएर पर सार्न खोज्छिन्। महिला प्रहरीले उनीतिर कफी सार्छिन्। यसरी दुईबीचको दोहोरीले कफी पोखिन्छ।
आस्थाले भिडियो सार्वजनिक हुनुअघि ती महिला प्रहरीलाई अशिष्ट र अभद्र व्यवहार गरेको, ‘तँ’ भनेर बोलाएको आरोप लगाएकी थिइन्। तर, भिडियो हेर्दा उनको व्यवहार पनि शिष्ट देखिँदैन। अझ त्यो घटनापछि उनले प्रहरीलाई फेसबुक लाइभमार्फत जुन शैलीमा गाली गरिन्, त्यो झन् अशिष्ट देखिन्छ।
त्यसैले आस्थालाई लिएर अहिले सामाजिक सञ्जालमा प्रश्न उठेको छ, ‘अरुलाई शिष्टता सिकाउनेले आफू शिष्ट हुनुपर्दैन?’
फिल्म निर्देशक विशाल भण्डारीले प्रहरीको समर्थन गर्दै फेसबुकमा लेखेका छन्, ‘कलाकारलाई सेक्युरिटी चेक नै गर्न नुहुने तर्क गलत हो। अहोरात्र सुरक्षार्थ खटिने सुरक्षाकर्मीको मनोदशा बुझेर थोरै सहकार्य गर्नु हामी आम नागरिक, कलाकार, भिआइपी, भिभिआइपी सबैको कर्तव्य हो। सहज छैन, त्यसरी दिनभर खटेर सबैको गाली सुन्दै सुरक्षा व्यवस्था चुस्त दुरुस्त राख्न। ’
आस्थाले रुँदै भनिन्– मरेर जाने चोला हो, किन झुट बोल्नुपर्यो
आस्था आज पुनः फेसबुक लाइभ आएर घटनाबारे बोलेकी छिन्। उनले पटकपटक रुँदै आफूले दुर्व्यवहार भोगेको बताएकी छन्। भिडियो लाइभमा उनले रुँदै भनेकी छिन्, ‘मरेर जाने चोला हो यार। किन मैले झुट बोल्नु पर्यो।’
उनले तथानाम गर्नेहरूले आफूलाई नबुझेरै गाली गरेको बताइन्। ‘तपाईंहरू भन्नुहुन्छ कि हुन्न– डन्ठा बोकेर हिँड्नेलाई डन्ठे, बन्दुक बोकेर हिँड्नेलाई बन्दुके, गाउनेलाई गाइने। नाच्नेलाई नर्तकी। हिरो हिरोइनलाई त्यस्तै। मैले आमा बाउको गाली देको हो? मैले त्यस्तो अपराध गरेको हैन। पहिला कुरा बुझ्नुस् अनि मात्र लेख्नुस्,’ उनले फेसबुक लाइभमा रुँदै भनेकी छन्, ‘हावाको भरमा गाली गर्न त्यस्तो नगर्नुस्। राम्रो भन्छ मान्छे कुण्ठित हुन्छ गाली गर्न उक्सिन्छ। सत्य तथ्य थाहा नपाइ कुर्लनुहुन्छ। तपाईंको दिदी बहिनीलाई भएको भए के गर्नुहुन्थ्यो?’
आफूलाई गाली गर्नेहरूलाई आस्थाले रुँदै भनेकी छन्, ‘मेरो आँसुले तिमीहरूलाई पोल्नेछ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
