काठमाडौं- गायिका आस्था राउतले पश्चिम रिम्बी माघे मेलामा प्रस्तुतिका लागि सिक्किम जाने क्रममा आफू प्रहरीको दुर्व्यवहारमा परेको दाबी गरिन्।
प्रहरीले आफूलाई दुर्व्यवहार गरेको बताउँदै उनले एउटा भिडियो आफ्नो पेजमा पोस्ट गरिन्। तीन मिनेटभन्दा लामो भिडियोमा आफूलाई प्रहरीले असभ्य भाषा बोलेर दुर्व्यवहार गरेको कुरा उल्लेख गरिन्।
भिडियो हेरेपछि लाग्छ- आस्था दुर्व्यवहारमा परेकी हुन्। प्रहरीले उनलाई असभ्य बोलेको हो।
तर, प्रश्न प्रहरीको व्यवहारमाथि मात्र उठ्दैन। आस्थाले प्रहरीलाई सामाजिक सञ्जालमार्फत् गरेको आक्रोशपूर्ण गालीगलौजमाथि पनि उठ्छ।
आस्थाका अनुसार उनलाई र उनीसँगै रहेकी एउटी महिलालाई महिला प्रहरीले नै ज्याकेट खोल्न लगाएर दुर्व्यवहार गरिन्।
तर, एउटा प्रहरीको व्यवहारबाट आक्रोशित आस्थाले समग्र प्रहरीलाई अपाच्य शब्दमार्फत् गाली गलौज गर्नु सुहाउँदो कुरा नहुने भन्दै सामाजिक सञ्जालमा उनको आलोचना हुन थालेका छ।
'कलाकारले यस्तो शब्द बोल्नु उचित हुँदैन। उसले आफ्नो मर्यादाको पनि ख्याल राख्नुपर्छ। प्रहरीलाई पाठ पढाउँदा आफैं चुकिन्,' उनीबारे एक कलाकारले नै टिप्पणी गरेका छन्।
आक्रोशमा भिडियोमा फेसबुक लाइभ गर्दा आस्थाले प्रहरीलाई भनेकी छन्, 'त्यही हो बोल्न पारा। यो पुलिस भन्ने स्लोगन हटा। पुलिस हो कि फुलिस।'
ती महिला प्रहरीको व्यवहारका कारण रिस पोख्दै आस्थाले भिडियोमा भनेकी छन्, 'त्यो किन आई त्यसरी। त्यसको बुढासँग झगडा परेछ कि हैन।'
प्रहरीले अनुसन्धान गर्ने भएपछि भिडियो डिलिट
प्रहरीले अनुसन्धान गर्ने भनेपछि आस्थाले भिडियो अहिले आफ्नो पेजबाट हटाएकी छन्। आफूले रिसको आवेगमा नराम्रो शब्द बोलेको भन्दै उनले सामाजिक सञ्जालमा माफीसमेत मागेकी छन्।
'रिसको आवेगमा वेद पढिँदैन, मलाई पनि त्यस्तै भयो। यसको लागि क्षमा चाहन्छु। प्रशासनको राम्रो कामप्रति मलाई सधैं सम्मान छ। तर सर्वसाधारणसँग बोल्दा तुत्क्ष व्यबहार नगरियोस्। तँ तँ र म म गर्न बन्द गरियोस्। नैतिक शिक्षाको कमि नरहोस्,' उनले माफी माग्दै फेसबुकमा लेखेकी छन्।
प्रहरीको चरित्रमा दाग लगाइन् : प्रहरी
आस्थाले बोलेको शब्दप्रति भने प्रहरीले आपत्ति जनाएका छन्। उनको अपाच्य शब्दले प्रहरीकै चरित्रमा दाग लागेको महानगरीय प्रहरी परिसर काठमाडौंका डिएसपी होबेन्द्र बोगटीले नेपाल लाइभलाई बताए।
'आस्था राउतले बोलेको कुरा अपाच्य देखिए। प्रहरीकै मोरल डाउन हुने खालका शब्द प्रयोग भएका छन्। एउटा सेलिब्रेटीले प्रहरीका विरुद्ध यसरी बोल्दा समाजमा पक्कै नराम्रो म्यासेज जान्छ,' डिएसपी बोगटीले भने।
प्रहरीले यस सन्दर्भमा अनुसन्धान गरिरहेको र यसबारे आवश्यक कारबाही समेत गर्ने उनले बताए।
'यो कुरा प्रहरीले मनन गरेको छ। कुन सन्दर्भमा यसो भनिएको हो। हामीले अनुसन्धान गर्दैछौं। कारबाही गर्नुपर्ने आवश्यक देखिएमा कारबाही हुन्,' बोगटीले नेपाल लाइभसँग भने।
यस्तो बोलेकी थिइन् आस्थाले
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
