पोखरा- साग अन्तर्गत बिच भलिबलमा श्रीलंकाले २ स्वर्ण जितेको छ। नेपाल र पाकिस्तान भने कास्य पदक जितेका छन्। नेपालले महिलातर्फ कास्य जितेको हो।
आइतबार कास्य पदकका लागि नेपालकै दुई टिमबीच खेल भएको थियो। नेपालकी विनिता बुढाथोकी र नेबिका चौधरीको जोडीले नेपालकै कोपिला उप्रेती र मनीषा चौधरीको जोडीलाई सेमिफाइनलमा २१–१२, १९–२१ र १६–१४ को सेटमा पराजित गर्दै कास्य जित्यो। नेपालको दुवै टिम समूह उपविजेता हुँदै सेमिफाइनल प्रवेश गरेका थिए।
महिला बिच भलिबलको स्वर्ण पदक र रजत पदक भने श्रीलंकाले जित्यो। श्रीलंकाका दुवै टिम समूह विजेता बन्दै फाइनल प्रवेश गरेका थिए। पुरूषतर्फ नेपालको दुवै टिम लिग चरणबाट बाहिरिए। श्रीलंकाको महिला र पुरुष दुबैतर्फ २÷२ टिम फाइनल पुग्दै स्वर्ण र रजत जित्न सफल भए।
पुरुषतर्फ पनि श्रीलंकाले नै स्वर्ण र रजत पदक जित्यो। श्रीलंकाको प्रदीप आसंका र असेन कुमाराको जोडीले इन्डिका टिरोन र जायन सनुजाको जोडीलाई २४–२२ र २१–१३ को सेटमा हराउँदै स्वर्ण जित्यो। महिलातर्फ श्रीलंकाकै दीपिका जेडेरा र मधुशानी वीरासिंगेको जोडीले लक्षिनी थारुका र दिनेशा प्रसादनीको जोडीलाई १९–२१, २१–१५ र १५–८ को सेटमा हराएर स्वर्ण जित्न सफल भयो।
पुरुषतर्फ पाकिस्तानले कास्य जित्यो। पाकिस्तानका मोहम्मद रज्जाक र वसीन मोहम्मदको जोडीले पाकिस्तानकै जस्नव खान र अफाख खानको जोडीलाई २१–१५ र २१–१४ को सेटमा हराएर कांस्य जित्न सफल भयो।
बिच भलिबलमा महिलातर्फ नेपाल, श्रीलंका र माल्दिभ्स सहभागी थिए। पुरूषतर्फ नेपालसहित श्रीलंका, पाकिस्तान, बंगलादेश र माल्दिभ्स सहभागी थिए। सागमा पहिलोपल्ट यो खेल समावेश भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
