काठमाडौं- विश्वकप छनोटमा कुवेतसँगको खेलअघि नेपाली राष्ट्रिय टिमका चार खेलाडीलाई टिमबाट निकालिएको घटनामा प्रशिक्षक र टिम व्यवस्थापकमाथि पनि अनुसन्धान हुनुपर्ने विभिन्न चार जिल्ला फुटबल संघले माग गरेको छ।
विश्वकप छनोटका लागि कुवेतसँगको खेल खेल्न भुटान जानुअघि अनुशासनहीन गतिविधिमा संलग्न रहेको भन्दै अखिल नेपाल फुटबल संघ (एन्फा)ले टिमबाट हटाएको थियो। स्ट्राइकर बिमल घर्ती मगर, मिडफिल्डर अन्जन विष्ट र सन्तोष तामाङ साथै डिफेन्डर दिनेश राजबंशी क्याम्प छाडेर रातभर ठमेलको डिस्कोमा रक्सीले मातेको बताइएको थियो।
यसमा काठमाडौं जिल्ला फुटबल संघका अध्यक्ष विराट जंग शाही, भक्तपुर जिल्ला फुटबल संघका अध्यक्ष गौतम सुजखु, धादिङ जिल्ला फुटबल संघका अध्यक्ष दीपक खतिवडा र ललितपुर जिल्ला फुटबल संघका अध्यक्ष पुरुषोत्तम थापाले खेलाडीसँगै अरु जिम्मेवार व्यक्ति र पक्षहरुलाई कारबाही हुनुपर्ने माग गरेका हुन्।
होस्टेलमा रहेका खेलाडी बाहिर भेटिनु, स्पष्टीकरण बिना तत्काल कारबाही गरिनु, टिमका व्यवस्थापक तथा सरोकारवालाहरुलाई सोधपुछ नहुनुले घटना गम्भीर रहेको भन्दै थप अनुसन्धान हुनुपर्ने उनीहरुको भनाइ छ। म्याच फिक्सिङसम्मको आशंका भइरहँदा एन्फाले थप अनुसन्धान गरी सत्यतथ्य सार्वजनिक गर्नुपर्ने उनीहरुले माग गरेका छन्।
यो पनि- विश्वकप छनोटका खेलाडी डिस्कोमा भेटिँदा राष्ट्रिय टिमलाई घाटा, ३ खेलाडीको अभाव
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।