काठमाडौं- विश्वकप फुटबलको छनोट अन्तर्गत दोस्रो चरणको खेलमा नेपाल अस्ट्रेलियासँग ५–० गोलले पराजित भएको छ। पहिलो हाफमा तीन गोल खाएको नेपालले दोस्रो हाफ थप दुई गोल खाएको हो।
अस्ट्रेलियाको क्यानबेरा रंगशालामा भएको खेलमा बलियो टोली अस्ट्रेलियाले नेपाललाई खेलभर दबाबमा राखेको थियो। हजारौँ नेपाली समर्थक क्यानबेरा रंगशालामा नेपालको समर्थन गर्न पुगेका थिए। तर नेपालको खेल दर्शकको हौसलाअनुरुप हुन सकेन।
खेलको पाँचौ मिनेटमा सजिलो बलमा गोलकिपर किरण चेम्जोङले गल्ती गर्दा नेपालले गोल खान पुगेको थियो। पहिलो र दोस्रो दुवै हाफमा केही उत्कृष्ट बचाउ गरेका उनले खेलको ५९ औँ मिनेटमा पनि सामान्य गल्तीका कारण गोल खान पुगेका थिए।
अस्ट्रेलियाका लागि पहिलो गोल जेमि म्याकलरेनले गरेका थिए। म्याकलरेनले नै अस्ट्रेलियाका लागि खेलको १८ औँ मिनेटमा दोस्रो गोल गरेका थिए।
यस्तै खेलको २४ औँ मिनेटमा कर्नरबाट आएको बल अस्ट्रेलियाका ह्यारी सोटरले गोल गर्दै ३–० को अग्रता बनाएका थिए। ५९ औँ मिनेटमा ह्यारीले नै व्यक्तिगत दोस्रो र टिमका लागि चौथो गोल हानेका थिए। खेलको ९० औँ मिनेटमा म्याकलरेनले ह्याट्रिक गर्दै अस्ट्रेलियालाई ५–० को जित दिलाए।
नेपाली टोलीका प्रशिक्षक योहान कालीनले अस्ट्रेलियाविरुद्ध स्ट्राइकर बिमल घर्ती मगरलाई बेन्चमा राखेर अभिषेक रिजाललाई मौका दिँदै ४–५–१ को फर्मेसनमा खेलाएका थिए। अस्ट्रेलियाको पोस्टमा नेपालले एउटै राम्रो प्रहार गर्न सकेन। ६६ औँ मिनेटमा अभिषेकको स्थानमा बिमल मैदान छिरेका थिए।
नेपाली टोलीले क्यानबेरा पुग्नुअघि एक हप्तान सिड्नीमा अभ्यास गरेको थियो। युरोपमा व्यावसायिक फुटबल खेल्ने अनुभवी अस्ट्रेलियन खेलाडीसामु नेपाललाई खेल अवधिभर बल नियन्त्रणमा लिन पनि मुस्किल परेको थियो।
नेपालको खेलमा जम्मा २४ प्रतिशत बल पोसेसन बनाउन सक्यो। पोस्टमा अस्ट्रेलियाले ३७ प्रहार गर्दा नेपालले एक प्रहार मात्रै गर्न सक्यो।
नेपाल छनोटको पहिलो खेलमा कुवेतसँग ७–० ले पराजित भएको थियो भने दोस्रो खेलमा चाइनिज ताइपेइलाई २–० ले हराएको थियो।
अब नेपालले असोज २८ गते जोर्डनसँग जोर्डनकै मैदानमा खेल्नेछ। टोली अष्ट्रेलियाबाट नै जोर्डन प्रस्थान गर्ने योजना रहेको छ। जोर्डनसँगको खेलपछि नेपाली टिमले छनोटका बाँकी चार खेल घरेलु मैदानमा खेल्नेछ।
....
फिफा वरीयताको एसियाली राष्ट्रमा शीर्ष ३४ भित्र पर्दै नेपालले विश्वकप छनोटको दोस्रो चरणमा सिधै स्थान बनाएको हो। जसमा अप्रिलमा भएको वरीयताअनुसार एसियाली राष्ट्रभित्र नेपाल ३४औं स्थानमा नै थियो।
दोस्रो चरणमा रहेका ८ समूह विजेताका साथै ४ उत्कृष्ट उपविजेता गरी १२ टिम विश्वकप छनोटको अन्तिम चरणमा पुग्नेछन्। यी १२ टिमले नै सन् २०२३ मा हुने एसियन कपमा स्थान बनाउने भएकाले पनि प्रतियोगिताको महत्व बढेको छ।
नेपाली टिमको नियमित कप्तान विराज महर्जन टिममा यसपटक पनि छैनन्। उनी अभ्यासमा नै सामेल गराइएका थिएनन्। विराज टिममा नपरेपछि नेपाली टोलीको कप्तानी गोलकिपर किरण चेम्जोङले गरिरहेका छन्।
विश्वकप छनोटमा समूह ‘बी’ मा नेपालसहित अस्ट्रेलिया, जोर्डन, कुवेत र चाईनिज ताइपेइ रहेका छन्।
नेपालले मंसिर ३ गते कुवेतसँग दशरथ रंगशालामा, चैत १३ गते चाइनिज ताइपेइसँग दशरथ रंगशालामा खेल्नेछ। आउँदो वर्ष जेठ २२ गते दशरथ रंगशालामा जोर्डनसँग खेल्नेछ। यस्तै नेपालले अस्ट्रेलियासँग दशरथ रंगशालामा चैत १८ गते खेल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
