काठमाडौं- मुलपानी क्रिकेट मैदानमा आउँदो असोज २ देखि १५ गतेसम्म यु १९ एकेडेमी क्रिकेट लिग (एसिएल) टी२० क्रिकेट प्रतियोगिता हुने भएको छ।
नेक्सस क्रिकेट एकेडेमीको आयोजनमा हुने प्रतियोगितामा देशभरबाट विभिन्न १६ टिम सहभागी रहेका छन्।
जसमा नेक्ससका दुई टिमसँगै ओसिस क्रिकेट एकेडेमी काठमाडौं, विराटनगर क्रिकेट एकेडेमी मोरङ, स्वतन्त्र युवा क्रिकेट एकेडेमी विरगञ्ज, जय क्रिकेट एकेडेमी महेन्द्रनगर, ग्रेटर हिमालय क्रिकेट एकेडेमी काठमाडौं, वेस्टर्न क्रिकेट एकेडेमी वुटवल, ज्ञानज्योति क्रिकेट एकेडेमी दाङ, पोखरा क्रिकेट एकेडेमी पोखरा, राइजिङ पोखरा क्रिकेट एकेडेमी कास्की, हिमालय क्रिकेट एकेडेमी काठमाडौं, रामारोशन क्रिकेट एकेडेमी काठमाडौं, नेपाल स्पोर्टस् म्यानेजमेन्ट काठमाडौं, एन्जल स्पोर्टस एकेडेमी काठमाडौं र काठमाडौं क्रिकेट ट्रेनिङ सेन्टर (केसिटिसी) सहभागी छन्।
सहभागी टिमलाई चार चार टिममा बाँडेर चार समूह बनाइएको छ। जसमध्ये समूहको शीर्ष टिम सेमिफाइनलमा पुग्नेछन्। प्रतियोगितामा सहभागी खेलाडीका लागि ५ लाख रुपैयाँको दुर्घटना बिमा गरिएको आयोजक नेक्ससले जनाएको छ।
प्रतियोगिताको विजेताले १ लाख ५० हजार साथै उपविजेताले १ लाख रुपैयाँ पुरस्कार पाउने छन्। हरेक खेलका म्यान अफ दि म्याचका लागि १ हजार रुपैयाँसहित ट्रफी दिइने आयोजकले जनाएका छन्।
साथै प्रतियोगिताकै उत्कृष्ट बलर, उत्कृष्ट ब्याट्सम्यान, म्यान अफ दि सिरिज र इमर्जिङ प्लेयर हुने खेलाडीलाई पनि पुरस्कृत गरिने जनाइएको छ। प्रतियोगिताका चार उत्कृष्ट खेलाडीलाई नेक्ससले भारतको दिल्लीमा ६ महिना निशुल्क प्रशिक्षणको व्यवस्था समेत गर्नेछ। साथै अन्य पाँच खेलाडीलाई नेक्ससको एकेडेमी काठमाडौंमा १ वर्ष प्रशिक्षणको व्यवस्था मिलाइने बताइएको छ।
लिग कम नकआउटका आधारमा हुने प्रतियोगितामा दिनमा दुई खेल खेलाइने र सबै खेल मुलपानी मैदानमा हुने बताइएको छ।
लगातारको वर्षाका कारण मुलपानी मैदानको अवस्था राम्रो छैन। त्यसमा खेल्न मिल्ने बनाउनका लागि राष्ट्रिय खेलकुद परिषदको पहलमा मैदानको मर्मत भइरहेको नेक्ससका प्रतियोगिता प्रमुख प्रबल गौतमले बताएका छन्। मैदानको अवस्था बिग्रिए केही दिन प्रतियोगिता सार्न सकिने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
