काठमाडौं- गएको सिजन भ्यालेन्सियाविरुद्धको खेल बार्सिलोनाका लागि सुखद भएन। भ्यालेन्सियासँग ला लिगामा पहिलो खेल १–१ र दोस्रो खेल २–२ को बराबरी खेलेको बार्सिलोना कोपा डेल रे को फाइनलमा २–१ ले पराजित भएको थियो।
नयाँ सिजनमा ३ खेलमा १ जित १ हार र १ बराबरीसहित आठौँ स्थानमा रहेको बार्सिलोना चौथो खेलमा भ्यालेन्सियासँग शनिबार राति पौने १ बजे क्याम्पनाउमा खेल्दैछ।
बार्सिलोनाका दुई प्रमुख स्ट्राइकर लुइस स्वारेज र लियोनल मेस्सी घाइते छन्। बिहीबार बिहान अभ्यासमा सामेल भएका स्वारेज भ्यालेन्सियाविरुद्ध मैदान उत्रने विश्वास गरिएको छ भने मेस्सी अझै आराममा नै छन्। पहिलो तीन खेलमा पाँच अंक गुमाइसकेको बार्सिलोनाका लागि प्रशिक्षक एर्नेस्टो भालभर्दे कुनै चुनौती लिने अवस्थामा छैनन्।
मेस्सीलाई च्याम्पियन्स लिग अन्तर्गत मंगलबार राति बोरुसिया डर्टमुण्डविरुद्ध हुने खेलसम्म ठिक हुने आशमा रहेका प्रशिक्षक भालभर्दे भ्यालेन्सियाविरुद्ध उनलाई खेलाउन चाहँदैनन्। त्यसका लागि पनि केही दिनमा उनको स्वास्थ्यमा हुने सुधारको पर्खाइ रहेको छ।
गएको सिजन चौथो नम्बरमा लिग सकाएर च्याम्पियन्स लिगमा छानिएको भ्यालेन्सियाले अहिले सिजनको सुरुतिरै प्रशिक्षक मार्सेलिनोलाई बर्खास्त गरेको छ। नयाँ प्रशिक्षकका रुपमा आएका अल्बर्ट सेनाडेसका लागि पनि बार्सिलोनासँगको पहिलो खेल महत्वपूर्ण छ।
भ्यालेन्सियालाई पछिल्लो ११ वर्षमा पहिलो उपाधि जिताएका प्रशिक्षक मार्सेलिनोको गतिमा अगाडि बढ्न सेनाडेसका लागि सहज छैन। दुई सिजन शीर्ष चारमा लिग सकाएका मार्सेलिनोको क्लब ब्यवस्थापनसँग सम्बन्ध नराम्रो हुँदा हटाइएका थिए। यसैले नयाँ प्रशिक्षक सेनाडेसका लागि उनले छाडेको उपलब्धि पाउने चुनौती बढी छ।
बार्सिलोनाले के योजना बनाउँछ र को को खेलाडी मैदान उतार्छ भन्ने योजना भ्यालेन्सियामा नयाँ प्रशिक्षकको सुखद सुरुवातसँग जोडिएको छ। बार्सिलोना जस्तै यो सिजन ३ खेलमा १ जित, १ हार र १ बराबरी खेलेको भ्यालेन्सिया १० औँ स्थानमा छ।
जर्मनबाट अन्तर्राष्ट्रिय खेलका बेला बेञ्चमा रहेका बार्सिलोना गोलकिपर मार्क आन्द्रे टेर स्टेगन टिममा फर्किसकेका छन्। पोर्चुगलबाट अन्तर्राष्ट्रिय खेलमा सामेल हुँदा घाइते भएका डिफेन्डर नेल्सन सेमेडो टिममा फर्किए पनि उनी खेल्ने नखेल्ने टुंगो लागेको छैन। स्यामुअल उमटिटी पनि पूर्ण फिट नहुनाले बार्सिलोनाको सेन्टर मिडफिल्डमा जेरार्ड पिके र क्लेमेन्ट लेङलेट नै हुने पक्का जस्तै छ। लेफ्ट ब्याकमा जोर्डि अल्बा नै खेल्नेछन्।
बार्सिलोनाका प्रशिक्षक भालभर्देका लागि खेलाडीको संयोजन मिलाउन सबैभन्दा कठिन मिडफिल्डमा नै देखिएको छ। यसैले भ्यालेन्सियाविरुद्ध पनि उनको मिडफिल्ड रोजाइ बुझ्न सहज छैन। नयाँ सिजनमा इभान राकिटिकले खेल्नै पाएका छैनन्।
गएको सिजन सम्भावना देखाएका कार्लेस एलेना पनि अहिले भालभर्देको छनोटमा छैनन्। फ्रान्की डि योङले नेदरल्याण्ड्सबाट देखाएको जस्तै खेल बार्सिलोनामा ल्याउन बाँकी नै छ। आफूले अहिले खेलिरहेको भन्दा धेरै राम्रो गर्न सक्ने उनी आफैले पनि बताइरहेका छन्। भालभर्दे सर्जी रोबर्टोलाई राइट ब्याकमा भन्दा मिडफिल्डमा नै खेलाउने पक्षमा देखिन्छन्। मिडफिल्डमा नै आर्थरलाई पनि राख्ने योजनामा उनी छन्।
मेस्सी घाइते नै रहेकाले कार्लेस पेरेजले सुरुवातमा नै मौका पाउने देखिन्छ। घाइते नै रहेका स्वारेज अभ्यासमा फर्किएकाले उनी टिममा सामेल हुने विश्वास बढेको छ। एन्टोनियो ग्रिजम्यान पनि फरवार्ड लाइनमा हुनेछन्। अन्सु फाती पनि पहिलो टिममा अभ्यास गरिरहेका छन्।
सम्भावित सुरुवाती ११ - टेर स्टेगेन, सेमेडो, पिके, लेङलेट, अल्बा, आर्थर, बुस्केट्स, डि योङ, पेरेज, स्वारेज र ग्रिजम्यान
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791043321.png)
-1791041970.png)
-1786602170.png)
