काठमाडौं- स्पेनिस क्लब बार्सिलोनाले फ्रेन्च क्लब पिएसजीसँग स्ट्राइकर नेमारका लागिस म्झौता गर्न नसकेकोमा आफूहरु दुःखी नभएको बार्सिलोना कप्तान लियोनल मेस्सीले बतााएका छन्।
बार्सिालोनाले खेलाडी किनबेचका लागि तोकिएको समयमा अन्तिम दिनसम्म पनि पिएसजीबाट स्ट्राइकर नेमार ल्याउन गरेको प्रयास असफल भएको थियो। त्यसले बार्सिलोना प्रशिक्षकले सोचेको नयाँ योजनामा असर पर्ने तर्कहरु आइरहेका थिए। बार्सिलोना आउने नेमारकै इच्छा भए पनि पिएसजीको माग पूरा गर्न बार्सा असफल भएको थियो।
‘नेमारलाई बार्सिलोना ल्याउन नसकेको कुरामा हामी निराश र दुःखी छैनौँ, हामीसँग अहिले नै पनि एकदमै राम्रो खेलाडीहरुको समूह छ, जो नेमारबिना पनि हरेक कुराका लागि प्रतिस्पर्धा गर्न योग्य छन्’ मेस्सीले भनेका छन्।
तर मेस्सीले नेमारलाई ल्याउनका लागि बार्सिलोनाले थप केही मेहनत गर्न सक्थ्यो कि भन्ने आशयमा बोलेका छन्। ‘यदि नेमार बार्सिलोनामा फर्किएको भए म खुसी हुने थिएँ, इमान्दार भएर भन्दा नेमारलाई ल्याउनका लागि बार्सिलोनाले पूरा मेहनत गरेको थियो या थिएन मलाई थाहा छैन’ उनले भनेका छन्।
आफूले नेमारलाई ल्याउनु पर्छ भनेर कहिल्यै नबोलेको तर नेमार आउँदा के हुन्छ भन्ने विचार मात्रै राखेको उनको भनाइ छ। ‘तर पनि नेमारका लागि पिएसजीसँग सहमतिमा जानु सजिलो छैन भन्ने मैले बुझेको छु। खेललाई हेरेर कुरा गर्ने हो भने नेमार विश्वका उत्कृष्ट खेलाडीमध्ये एक हुन्’ उनले भने।
नेमारका बार्सिलोनाले गरेका प्रस्तावहरु लगातार अस्वीकृत हुँदा नेमार पिएसजीमै रोकिएका थिए। यतिसम्मकी बार्सिलोना जान अपुग रकममा २० मिलियन युरो आफै तिर्नसमेत नेमार तयार भए पनि सम्झौता भने हुन सकेन।
यसमा मुख्य कारण नै पिएसजीले नेमार बेच्न नचाहनु र बार्सिलोनाले पिएसजीले भनेजस्तो महँगो रकम तिर्न नसक्नु रहेको छ। लगातारको छलफलमा बार्साका दुई खेलाडीसँगै पिएसजीले १५० मिलियन युरोसम्म माग गरेको थियो। त्यसमा इभान राकिटिक र उसमान डेम्बेले जस्ता खेलाडी दिन बार्सिलोना इच्छुक भने देखिएन। बार्सिलोनाले नेमारका लागि १७० मिलियन युरो तिर्ने र त्यसमा दुई चरणमा पैसा दिने सहमतिको प्रयास गरेको थियो।
२०१७ मा बार्सिलोना छाडेर २०० मिलियन पाउण्ड कीर्तिमानी रकममा पीएसजी पुगेका नेमार पुनः बार्सिलोना फर्कने प्रयासमा ठूलो रकम नै बाधक बनेको हो। जसले पिएसजी खेलाडी किनबेचको समय टारेर नेमारलाई क्लबमै राख्न सफल भयो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786379871.png)
-1764146706.png)
-1786184812.png)
