काठमाडौँ- राष्ट्रिय मानवअधिकार आयोगले द्वन्द्वकालीन मुद्दा टुंग्याउन बनाइएका दुई आयोगमा पदाधिकारी नियुक्त गर्ने प्रक्रिया निष्पक्ष नबनाए सिफारिस समितिबाटै बाहिरिने चेतावनी दिएको छ।
संक्रमणकालीन न्यायलाई संबोधन गर्न आयोगलाई पूर्णता दिने विषयमा संचार माध्यममा प्रकाशित समाचारप्रति आयोगले ध्यानाकर्षण भएको जनाउँदै यस्तो चेतावनी दिएको हो।
सत्य निरुपण तथा मेलमिलाप अयोगमा पूर्वमहान्याधिवक्ता रमण श्रेष्ठलाई पठाउन र बेपत्ता पारिएका व्यक्तिको छानबिन आयोगमा पुरानै पदाधिकारी पठाउन दलहरू सहमतिमा पुगेका खबर बुधबार सार्वजनिक भएका थिए।
'संक्रमणकालीन न्यायको विषय निष्कर्षमा पुर्याउने सम्बन्धमा विस्तृत शान्ति सम्झौताको बेलादेखि नै राष्ट्रिय मानव अधिकार आयोग सजग छ। यस सम्बन्धमा आयोगले समय–समयमा आफ्ना धारणा व्यक्त गर्दै आइरहेको सबैमा अवगतै छ,' आयोगले जारी गरेको विज्ञप्तिमा भनिएको छ।
संक्रमणकालीन न्यायलाई संबोधन गर्ने आयोगलाई पूर्णता दिने विषयमा संचार माध्यमहरुमा हालै प्रकाशित समाचारहरु प्रति आयोगको गम्भीर ध्यानाकर्षण भएको छ र यसप्रति आयोग आश्चर्यचकित छ।
सिफारिस गर्ने जिम्मेवारी कानूनद्वारा नै व्यवस्था गरिएको सिफारिश समितिको भएको भन्दै आयोगले समितिबाट स्वतन्त्र, निष्पक्ष, पीडितमैत्री तथा पारदर्शी रुपमा मानव अधिकारका मूल्य र मान्यता अनुकूल योग्य व्यक्तिहरु सिफारिश गरिनुपर्ने उल्लेख गरेको छ।
सरकारले आयोगका अध्यक्ष तथा सदस्य सिफरिसका लागि गत चैत १२ गते पूर्वप्रधानन्यायाधीश ओमप्रकाश मिश्रको संयोजकत्वमा ५ सदस्यीय समिति गठन गरेको थियो।
आयोगका अध्यक्ष अनूप राज शर्माले बिहीबार जारी गरेको विज्ञप्तिमा सिफारिस समितिमा आयोगको समेत प्रतिनिधित्व रहेको स्मरण गराइएको छ।
‘रिक्त रहेका ती दुवै आयोगहरुको पदाधिकारी चयन गर्ने सम्बन्धमा संचार माध्यममा आए अनुरुप हुने हो भने नियुक्ति प्रकृयामा निष्पक्षता, तटस्थता र पारदर्शिता समेत नरहने अनुभूति आयोगलाई भएको छ,’ शर्माले जारी गरेको विज्ञप्तिमा भनिएको छ,‘यस्तो परिस्थितिबाट द्वन्द्व पीडितहरुले न्यायको अनूभूति गर्न कठिन हुने र कानूनद्वारा अख्तियारी प्रदान गरिएको सिफारिश समितिको वैधता र निष्पक्षता माथि नै प्रश्न चिन्ह समेत खडा हुने भएकोले उक्त समितिमा रही आयोगले कार्य गर्ने वा नगर्ने सम्बन्धमा पुनर्विचार गर्न सक्ने तर्फ आयोग गम्भीर रहेको धारणा सार्वजनिक गर्दछ।’
आयोगले ऐन संशोधन प्रक्रियामा राजनीतिक वृत्तको ध्यानाकर्षण भएकोमा भनेसन्तोष व्यक्त गरेको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
