काठमाडौं- वेस्ट इन्डिजसँगको एकदिवसीय सिरिजको दोस्रो खेल ५९ रनले जितेसँगै शतक बनाएका भारतीय टिमका कप्तान विराट कोहलीले टिमको आवश्यकताअनुसार खेल्न सकेको भन्दै खु्सी व्यक्त गरेका छन्।
टस जितेर ब्याटिङ रोजेको भारतले ५० ओभर पूरा खेल्दै ७ विकेट जाँदा २ सय ७९ रन बनाएको थियो। जसमा तेस्रो नम्बरमा ब्याटिङ गरेका कोहलीले १ सय २५ बलमा १ सय २० रन बनाएका थिए। यस्तै श्रेयस ऐयरले ६८ बलमा ७१ रन बनाएका थिए।
‘टिमलाई आवश्यक पर्दा शतक बनाउन सकेँ त्यसमा खुसी छु, शिखर र रोहितको राम्रो नहुँदा मैले सम्हालिएर नै खेल्नुपर्ने थियो, त्यहीअनुसार भयो पनि’ जितपछि कोहलीले भने।
बर्षाले प्रभावित भएपछि वेस्ट इन्डिजले ४६ ओभरमा २ सय ७० रन बनाउनुपर्ने थियो। तर, ४२ ओभरमा २ सय १० रन बनाउँदा वेस्ट इन्डिजले सबै विकेट गुमायो। इविन लेविसले ८० बलमा ६५ रन र निकोलस पुरनले ५२ बलमा ४२ रन बनाउनुबाहेक अन्य
ब्याट्सम्यानको योगदान राम्रो रहेन। आफ्नो तीन सयौँ एकदिवसीय खेलेका क्रिस गेलले २४ बलमा ११ रन मात्रै बनाउन सके।
भारतको जितमा भुवनेश्वर कुमारले चार विकेट लिए। यस्तै मोहम्मद सामी र कुलदीप यादवले दुई/दुई साथै रविन्द्र जडेजाले एक विकेट लिए।
जितसँगै पहिलो एकदिवसीय बर्षाका कारण रोकिएको तीन खेलको सिरिजमा भारत १–० ले अगाडि रहेको छ। तेस्रो एकदिवसीय अगस्ट १४ मा हुनेछ। यसअघि तीन टी–२० को तीनै खेल भारतले जितेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
