सुर्खेत- कालीकोटमा शुक्रबार म्यादी प्रहरीको बिदाइका क्रममा प्रहरी र म्यादी प्रहरीबीच भएको झडपमा एकजनाको मृत्यु भएको घटनाले आज पनि कालीकोट तनावग्रस्त बनेको छ।
म्यादी प्रहरी र स्थानीयबासीले प्रहरीले ज्यादती गरेको भन्दै विरोध प्रदर्शन जारी राखेका छन्। विरोधमा उत्रिएका म्यादी प्रहरी र स्थानीयबीच आज पनि सामान्य झडप भएको छ। स्थानीय प्रशासनले सुरक्षा व्यवस्थाका लागि सुरक्षाकर्मीको संख्या बढाएको छ भने म्यादी प्रहरी र स्थानीयबासीले विविन्न माग राखी नाराबाजी गरेका छन्।
घटनाको छानविन गरी दोषीलाई कारबाही गर्नुपर्ने, मृतकलाई सहिद घोषणा गर्नुपर्ने, म्यादीले पाउनुपर्ने जति पारिश्रमिक पाउनुपर्ने लगायतका माग राखेर स्थानीयबासी पनि म्यादी प्रहरीसँगै विरोधमा उत्रिएका हुन्।
यसैबीच, क्षेत्रीय प्रशासक र डिआइजिसहितको टोली घटनाबारे बुझ्न कालीकोट पुगेको छ।
शुक्रबार म्यादी प्रहरीको बिदाइ कार्यक्रममा कम पारिश्रमिक दिएको भन्दै ढुंगामुडा प्रहार गर्न थालेपछि प्रहरीसँग झडप भएको थियो। प्रहरीको गोली लागेर सहकर्मी विवेक ऐडीको मृत्यु भएको भन्दै आक्रोशित बनेका म्यादी प्रहरीले जिल्लाका दुई वटा प्रहरी बिटमा तोडफोड गरी आगजनी गरेका थिए।
आक्रोशित म्यादी प्रहरीले कालीकोट जिल्लाको जिरोप्वाइन्टमा रहेको प्रहरी बिट र प्रतिमाचोकमा रहेको प्रहरी बिटमा तोडफोड गरेका थिए।
स्थानीय प्रशासनले भने गोली लागेर नभई ढुंगाले लागेर ऐडीको मृत्यु भएको बताउँदै आएको छ। ऐडीको मृत्यु शंकास्पद भएको भन्दै प्रहरीले छानबिनसमेत थालेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
