काठमाडौं– एभरेस्ट प्रिमियर लिग (इपिएल) क्रिकेट प्रतियोगितामा चितवन टाइगर्सले पहिलो जित हात पारेको छ। शनिबार भएको दोस्रो खेलमा कप्तान दीपेन्द्रसिंह ऐरी र प्रविन गुप्ताले अर्धशतक प्रहार गरेपछि चितवनले ललितपुर पाट्रिओट्सलाई ५ विकेटले पराजित गरेको हो।
ललितपुरले दिएको १ सय ३१ रनको लक्ष्य चितवनले १९.२ ओभरमा ५ विकेट गुमाएर पार गर्यो।
चितवनका लागि कप्तान दीपेन्द्रले ५५ रन बनाए। दीपेन्द्रले ५० बलमा ७ चौका हिर्काए।
यस्तै प्रविन गुप्ताले पनि अर्धशतक प्रहार गरे। उनले नटआउट ५६ रन जोड्न ४३ बलको सामना गरेर ४ चौका र २ छक्का प्रहार गरे। आकाश थापा ४ रनमा नटआउट रहे।
दीपेन्द्र र प्रविनबीच पाँचौ विकेटका लागि ८१ रनको साझेदारी भएपछि चितवनको स्थिति मजबुत बनेको थियो।
त्यसअघि खराब ओपनिङ गरेको चितवनका ओपनर दिलीप नाथ शून्य र सुनाम गौतम २ रनमै पेभेलियन फर्के। लगत्तै सावेज खान ३ र योगेन्द्रसिंह कार्की शून्य रनमा आउट हुँदा चितवन समस्यामा परेको थियो। छैटौं ओभरमा चल्दै गर्दा ४ विकेट गुमाएर ३३ रन गुमाएको चितवनको इनिङलाई दीपेन्द्र र प्रविनले अघि बढाएका थिए।
बलिङतर्फ ललितपुरका सनी पटेलले ३ विकेट हात पारे। ललितनारायण राजवंशी र सन्दीप लामिछानेले १–१ विकेट आफ्नो नाममा लेखाए।
त्यसअघि टस जितेर पहिले ब्याटिङ गरेको ललितपुर २० ओभरमा १ सय ३० रनमा अलआउट भयो। ललितपुरका लागि जयकिशन कोल्सावालाले सबैभन्दा बढी ३१ रनको योगदान गरे। उनले ३१ बलमा ३ चौका हिर्काए। ओपनर शंकर रानाले २७ रन बनाए। उनले ३७ बलमा ४ चौका प्रहार गरे। सोनु तामाङले १९ र कप्तान ज्ञानेन्द्र मल्लले १० रन बटुले। सुवोध भाटीको २३ रन पनि ललितपुरका लागि महत्वपूर्ण सावित भयो।
बलिङतर्फ चितवनका योगेन्द्रसिंह कार्कीले ४ विकेट लिए। प्रवेश कुमार र प्रविण गुप्ताले २–२ विकेट हात पारे। कमलसिंह ऐरीले १ विकेट आफ्नो नाममा लेखाए।
जितसँगै चिनवनले प्लेअफमा पुग्ने सम्भावना जीवित राखेको छ। चितवनको ४ खेलबाट २ अंक छ। ललितपुर र काठमाडौंले पनि समान खेलबाट २–२ अंक बटुलेका छन्। शीर्ष स्थानको विराटनगरको ८ अंक छ भने पोखरा र भैरहवाले ४–४ अंक जोडेका छन्। पोखरा र भैरहवाले ३–३ खेल मात्र खेलेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
