काठमाडौं- सत्तारुढ नेपाल कम्युनिस्ट पार्टी (नेकपा)का प्रमुख सचेतक देव गुरुङले द्वन्द्वकालीन मुद्दा देखाएर नेपालमा विदेशी सेना भित्र्याउने प्रयास भइरहेको बताएका छन्।
प्रतिनिधिसभाको बैठकमा बोल्दै गुरुङले दुई छिमेकी देश चीन र भारतलाई लक्षित गर्दै नेपालमा विदेशी सेना छिर्न लागेको टिप्पणी गरेका हुन्।
जनयुद्धले आमूल परिर्वतन गरेको भन्दै गुरुङले सबै पक्ष मिलेर गणतन्त्र स्थापना गरेको बिर्सन नहुने बताए।
‘द्वन्द्वले यत्रो उपलब्धि हासिल गरेपनि मुद्दा हल भएका छैनन्, यो मुद्दालाई सधै बाँकी राख्दा कता जान्छौ,’ गुरुङले भने, ‘टिआरसी आयोग बनेको छैन, कानन संशोधन हुन सकेको छैन तर पश्चिमा शक्तिकेन्द्र यसमा खेल्न खोजिरहेका छन्।’
नेपालमा जसरी भएपनि द्वन्द्व मच्चाउने र यो मुद्दाहरु समाधान हुन नदिने खेलमा विदेशीहरु रहेको गुरुङले आरोप लगाए।
‘द्वन्द्व मच्चाउदै गएर विदेशी सेना भित्र्याउने खेल भई रहेको छ,’ उनले भने, ‘नेपालमा सेना भित्राएर छिमेकी देशहरु विरुद्ध प्रयोग गर्ने विश्व राजनीति केन्द्रित भएको छ।’ यही कुराका लागि शान्ति प्रक्रियका मुद्दाहरु समाधान गर्न नदिएर अड्काइएको दाबी गुरुङले गरे।
‘द्वन्द्वकालमा मुद्दा लागेकाहरुले पुर्जि आहिले दिने काम किन भईरहेको छ,’ उनले भने, ‘सेनाबाट विद्रोह गरेर जनमुक्ति सेनामा लागेकालाई किन अहिले जन्मकैदको फैसला आईरहेको छ।’
केही दिन पहिले संयुक्त राष्ट्रसंघसहित अन्य देशले जारी गरेको विज्ञप्ति त्यसैको परिणाम भएको भन्दै गुरुङले द्वन्द्वकालका मुद्दाहरु समाधान गर्न सरकारको ध्यानाकर्षण गराए।
‘९ मुलुकका राजदुतले र संयुक्त राष्ट्रसंघले किन विज्ञप्ति जारी गर्यो,’ उनले भने, ‘पटकपटक किन नेपालको द्वन्द्वकालका मुद्दामात्र उनीहरुको प्राथमिकतामा पर्ने गरेको छ।’
यो मुद्दा चर्काउन विदेशी मात्र नभई स्वदेशी शक्ति पनि लागेको उनको अरोप थियो। नेपालमा पनि सरकार बदल्ने कुरामा यही मुद्दा आउने र केही दल सधै सत्ता पक्ष बन्न यो मुद्दा उठाईरहेका आरोप उनले लगाए।
नेताहरुले विदेशी शक्तिलाई स्थान दिदाँ पनि उनीहरुले यो मुद्दाको आडमा सेना भित्राउने र छिमेकी विरुद्ध प्रयोग गर्न खोजेको गुरुङको आरोप थियो।
‘यदि यो अवस्था आयो भने नेपालको सार्वभौमसत्ता रहन्छ कि रहदैन,’ उनले भने, 'नेपाल अफगानीस्तान जस्तो मात्र हुँदैन।’
नेपालका कारण दुई छिमेकी मुलुकका बीचमा षड्यन्त्र भएमा नेपालको अस्तित्व नरहने उनको तर्क छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1766648928.png)
