विराटनगर– अर्थ मन्त्री ज्ञानेन्द्रवहादुर कार्कीले व्यापारीलाई कालोबजारी र नेतालाई भ्रष्टाचारी बुझ्ने मनोविज्ञान हाबी रहेको बताएका छन्। उनले व्यापारी र राजनीतिकर्मीको बारेमा रहेको नकारात्मक बुझाइ नहटाएसम्म आर्थिक एजेन्डामा मुलुकअगाडि बढ्न नसक्ने बताए।
मोरङ व्यापार संघले अर्थ मन्त्री कार्कीको सम्मानमा आइतवार आयोजना गरेको कार्यक्रममा यहाँका उद्योगी–व्यवसायीले दुई नम्बरी काम गर्ने चाहना नरहेपनि राज्यको बाध्यकारी नीति–नियमका कारण नीजि क्षेत्रलाई स्वच्छ बनाउन नसकिएको गुनासो गरे। त्यही गुनासोलाई सम्बोधन गर्दै अर्थ मन्त्री कार्कीले व्यवसायी जिम्मेवार र स्वच्छ हुनुपर्ने बताउँदै व्यापारी र नेताका बारेमा रहेको आमबुझाइको उदाहरण दिएका थिए।
‘व्यापारी भन्ना साथ कालोबजारी गर्छन भन्ने बुझाइ छ,’ अर्थ मन्त्री कार्कीले भने, ‘नेता भन्ने वित्तिकै झुठो बोल्ने र भ्रष्टाचार गर्ने बुझाइ छ ।’ उनले एकखाले मानिसमा रहेको यो नकारात्मक बुझाइ हटाउनुपर्ने बताए।
मोरङ कांग्रेसले आयोजना गरेको वीपी कोइरालासम्बन्धी कार्यक्रममा सहभागी हुन विराटनगर आएका अर्थ मन्त्री कार्कीले पूर्वको अद्यौगिक विकास र विस्तारमा आफू लागिरहेको बताए। विशेष आर्थिक क्षेत्र, औद्योगिक प्रदर्शनी केन्द्र, विराटनगर एयरपोर्टको विस्तार, चक्रपथ निर्माण र एकीकृत भन्सार बिन्दूको निर्माणमा अर्थमन्त्रालयले काम अगाडि बढाएको बताए। अर्थमन्त्री कार्कीले अरुण थर्ड जलबिद्युत आयोजनाको काम केही समयभित्र प्रारम्भ हुने समेत जानकारी दिए।
‘बिदेशी लगानीकर्ता मसँग भेट गर्न आउँदा पूर्वमा पनि सम्भावना छ, त्यतातिर पनि लगानी गर्नुस भनेर कन्भिन्स गरिरहेको छु,’ उनले भने, ‘मेरो कार्यकालमा पूर्व क्षेत्रमा राम्रै काम होस भन्ने चाहना छ।’ अर्थ मन्त्री कार्कीलाई मोरङ व्यापार संघका अध्यक्ष पवन कुमार सारडा र उद्योग संगठन मोरङका अध्यक्ष मुकेश उपाध्यायले भूकम्प, नाकाबन्दी र बाढीले पूर्वको उद्योग–व्यवसायलाई ठूलो क्षति भएको भन्दै राहतका लागि सरकारसँग माग गरे ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
