किभ- युक्रेनका नवनिर्वाचित राष्ट्रपति भोलोड्यम्यर जेलेन्स्कीले सोमबार पद बहाली गरेका छन्। पद बहालीका अवसरमा संसदमा राष्ट्रपतिको रुपमा पहिलो सम्वोधन गर्दै उनले पृथकतावादीहरुसँग भइरहेको द्वन्द्व र आर्थिक समस्या समाधान गर्नेतर्फ आफूले प्राथमिकतासाथ काम गर्ने बताए।
हास्यकलाकारसमेत रहेका ४१ वर्षीय जेलेन्स्की युक्रेनको इतिहासमा अहिलेसम्मकै सबैभन्दा कान्छो राष्ट्रपति भएको बताइएको छ। उनले द्वन्द्वग्रस्त डोनबस क्षेत्रमा युद्धविराम गर्नु आफ्नो पहिलो काम हुने पनि संसदमा घोषणा गरे। उनले सरोकारवालाहरुसँग तत्काल वार्ता थाल्ने पनि बताए।
'हामीले युद्ध गरिरहने होइन, त्यो तत्काल अन्त्य गर्नुपर्दछ,' उनले भने, 'हामी वार्ताका लागि तयार छौँ, वार्ताबाट समस्याको समाधान सम्भव छ।' उनले आफ्नो अर्को मुख्य चुनौती भनेको गुमेको आफ्नो देशको भूमि फिर्ता गराउनु पनि रहेको बताए।
उनलाई विश्वका धेरै देशहरुले बधाई तथा शुभकामना दिएपनि आफ्नै छिमेकी मुलुक रुसले भने बधाई तथा शुभकामना दिएको छैन। तिक्ततापूर्ण सम्बन्ध रहेको रुसले विवाद समाधानका लागि जेलेन्स्कीले लिने निर्णयका आधारमा युक्रेनसँगको सम्बन्ध निर्धारण हुने जनाएको छ।
रुसका राष्ट्रपति भ्लादिमिर पुटिनले अहिले उनलाई बधाई तथा शुभकामना नदिएका रुसी विदेश मन्त्रालयले जनाएको छ। रासस/एएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
